噚晚情人節，特首董建華同兩位局長何志平以及王永平都帶埋太太，去文化中心睇愛情喜劇《後宮誘逃》，當係情人節重頭節目。呢齣歌劇係莫札特新婚燕爾之作，講一位西班牙貴族嘅愛人身陷土耳其後宮，佢誓要救出心上人嘅經過。
齣戲咁精采，難怪連廖秀冬都被吸引，佢提早收工由中環坐渡輪過海去文化中心，可惜冬冬手頭上趕緊份報告，諗諗吓費事一邊睇戲一邊心掛掛，未開場就掉頭走咗。情人節竟然與文件為伴？冬冬話已經習慣，平時晚晚都開OT到八、九點。
曾蔭權、曾蔭培兩兄弟唔睇歌劇，同太太去咗會展參加香港傷健策騎協會辦嘅慈善舞會，同另一半食飯跳舞之餘做埋善事。
阿松下晝就一支公出席中總春節酒會，問佢同太太伏明霞有乜嘢節目，佢神神秘秘，不停話「今晚寫budget（預算）。」又使出一招金蟬脫殼，叫記者問馬時亨會做乜，又話馬仔同太太食飯：「佢就乖啦。」成功轉移視線之後，中總會董李祖澤忽然同阿松講起財赤，佢話政府連二十三條藍紙草案都出埋，下一個焦點就輪到阿松你嘞。阿松馬上嚇到耍手拎頭，猛話：「我驚做埋最不受歡迎人物！」
傳真︰2623-9278
電郵︰