大市好沉悶，恒指高低波幅得63點，埋單有28點進帳，成交金額54億元，大家喺度等美國對伊拉克幾時郁手。
比較養眼嘅係滙豐（005）升1元，收83.50元，加拿大附屬公司業績良好，有啲刺激。滙豐同個市都係上吓落吓，滙豐1元波動，屬於好細，但啲窩輪就唔係咁計。
10大升幅輪中，有7件係滙豐Call輪，排頭位嘅9520，由1.3仙彈上2.2仙，有球幾易手，買賣冇乜意思，下月底到期，行使價90.50元，睇嚟，滙豐喺個幾月內升7元以上機會好微，隻輪最後都係會變廢紙。
若然伊拉克肯投降，又獲美國接納，咁又唔同，滙豐同其他股票，彈升1成都似，不過機會非常細。
滙豐Call輪9605，7月到期，現價88仙，溢價0.4%，槓桿率有9.5倍，數據非常靚，弊在全日成交得11萬份。
佐丹奴（709）近排好弱，昨再跌15仙，收2.45元，見99年6月以來低位，即係差唔多4年未見過咁嘅價。佐丹奴Call輪9702收30仙，單日跌17%，明年1月到期，溢價46.1%，槓桿率8.2倍。隻輪面世3個星期，出世唔合時，就算正股唔再跌，隻輪咁嘅溢價都好難撐落去。
章盛