自古以來，湯圓代表了圓滿之意，在今日元宵佳節，當然要與愛侶同享一碗愛心湯圓。不過在早一輪的農曆新年，大家都已經吃掉了無數的湯圓落肚，再來一次，只怕了無新意，建議不如睇吓女朋友的個性屬反叛、傳統抑或創意型，再自己發掘一款最適合佢的圓形甜品，咁就可以取其圓滿之意的同時，兼夾向女友表現你的細心創意，達到雙贏局面。
記者：尹珊珊 攝影：林栢鈞
ImageModel：王穎、亞Man
適合人士：反叛型情侶
純果汁製作
咁大盤七彩繽紛的鮮果雪葩，女朋友見到都肯定嘩一聲叫。七種唔同口味的雪葩球是由純果汁製成，甜度比一般雪糕低，再淋上石榴凍汁及生果粒，酸酸甜甜好開胃。食時由淡至濃將蜜瓜、青檸、石榴、蘿蔔、芒果、椰子、紅莓雪葩逐一送進嘴裏，便可吃出每種雪葩的真正味道，當中以紅蘿蔔汁加蜜糖製成的蘿蔔雪葩最特別。
酸甜清新
肥嘟嘟的日本番茄出名清甜多汁，取其汁所製成的番茄雪葩，吃起來既有番茄的酸甜清新，又有雪葩的冰凍口感，一人獨享都唔怕滯，陣陣清香的番茄味和精緻靈巧的賣相更令人激賞。
適合人士：傳統保守型情侶
燕窩破圓而出
製法同爆漿牛丸有異曲同工之妙，加入新鮮菊花碎搓成的湯圓，以冰糖菊花茶底伴食，一啖咬下，內裏的冰糖燕窩破圓而出，夠晒驚喜，而菊花具明目清熱之效，燕窩又養顏滋潤，女朋友咁貪靚梗係會滿意啦！
紫米冰糖燕窩湯圓的製法無大分別，湯圓軟滑唔黏牙，又能保持燕窩本身的質感，最欣賞是甜度非常恰到好處，食落完全唔覺膩。
人手剪花瓣
玫瑰燕窩糯米糍及玫瑰冰糖燕窩湯圓，一乾一濕，揀邊款就梗係由女朋友話事。兩者矜貴之處在於玫瑰花的花瓣，是用人手逐片逐片剪至細碎，不但唔會破壞玫瑰花的質地，賣相亦會更加好睇。
適合人士：大膽創新型情侶
強勁立體感
平時食開的芒果黑糯米都係扁扁平平，咁有立體感確係好少見。甫上桌，鋪面的金黃色糖膠已有先聲奪人的感覺，再逐層逐層往下進攻，黑糯米煙韌彈牙不在話下，鮮甜的芒果肉更可減輕飽滯感，同女朋友一人一啖齊齊分享，煙韌程度肯定勁過碟芒果黑糯米。
甜中有苦夠過癮
賣相猶如一座燈塔的芒果層叠餅，脆餅以Filo皮、肉桂、牛油烘至紙般薄，再梅花間竹鋪在鮮甜的芒果肉上，比拿破崙餅更脆口，又無咁Heavy。至於配襯的白胡椒雪葩是用原粒白胡椒新鮮磨成，入口先有一股微甜，但瞬間喉頭卻被白胡椒的辣度所侵佔，過癮至極，似足一段甜中帶苦的愛情般。
煙韌麵包好軟熟
要愛情抑或要麵包?梗係最好兩樣都有啦！呢個中央釀有黑糯米的甜麵包，糯米煙韌麵包軟熟，款式極之罕有，吃時你一啖我一啖，夠晒甜蜜溫馨。
一冷一熱份外浪漫
法國人被喻為最浪漫的民族，在元宵佳節與愛侶分享一道傳統法國甜品，感覺上好似份外浪漫，代表作有呢道法國焦糖燉蛋，包含了熱和冷、鬆脆和軟滑兩大有趣對比，先感受到的是焗至玻璃般脆身的面層，與滑不溜口的燉蛋正好來個對比，接下來是一冷一熱兩種涇渭分明的口感，就好似愛情一樣，絕對愛恨分明。
適合人士：健康型情侶
晶瑩通透
女仔最愛美，包括賣相精緻的甜點，這款款香檳啫喱，晶瑩通透的啫喱內藏七彩的果片，啫喱充滿香檳味，高纖水果亦沾上酒味，甜中帶酸，醒晒！
三合一甜品
美顏燕窩、健康蛋白，同埋高纖蘋果，三樣都係女性最愛嘅食物，將佢哋三合為一，女友必讚你醒目又體貼。冰糖蛋白燕窩焗蘋果必可成為今晚嘅秘密武器。
THAIBASIL（25374682）
地址：金鍾太古廣場LG005號舖
營業時間：上午11時半至晚上11時
CafeLandmark（25264200）
地址：中環置地廣場1樓
營業時間：星期一至六上午8時至晚上9時，星期日及公眾假期上午9時至晚上7時。
INAGIKU（27332933）
地址：尖沙嘴東部麼地道69號帝苑酒店1樓
營業時間：中午12時至2時半，晚上6時至11時。
帝苑餅店（27332045）
地址：尖沙嘴東部麼地道69號帝苑酒店地下
營業時間：星期一至六上午8時至晚上8時，星期日及公眾假期早上9時至晚上8時。
Sabatini（27332000）
地址：尖沙嘴東部麼地道69號帝苑酒店3樓
營業時間：中午12時至下午2時半，晚上6時至11時。
豐盛堂（28560808）
地址：鰂魚涌濱海街86號地舖(太古坊側)
營業時間：星期一至五上午11時至下午6時半，星期六上午11時至下午3時，星期日及公眾假期休息。
TowngasAvenue（23672708）
地址：銅鑼灣百德新街59-65號地下
營業時間：中午12時至晚上11時
Kcal（24911938）
地址：荃灣深井村88號地下
營業時間：中午12時至下午3時，晚上6時至11時。