曼聯對阿仙奴呢場足總盃，絕對係大戰，不過「兵工廠」領隊雲格好似懶懶閒咁，唔通佢有奇招？
雲格一向鍾意喺賽前出口術，不過，喺今晚對曼聯大戰前，佢竟然冇乜表示，重喺星期三嘅友賽，畀去中國嘅巴西中場G施華踢足全場；反觀曼聯領隊費格遜就緊張得多，之前已經同英格蘭領隊艾歷臣講好咗班「米字旗」國腳喺友賽最多只可以踢四十五分鐘，佢重軟硬兼施咁同荷蘭國家隊教練艾禾卡特講，希望佢唔好要前鋒雲尼斯達羅踢咁耐；不過，艾禾卡特就當佢耳邊風。
如果睇兩個領隊嘅動態，好似曼聯比阿仙奴重視呢場波，但我求大俠就覺得唔係，雲格只不過係「置之死地而後生」，一反常態等班球員自己心急，對曼聯時大踢好波，而我哋《蘋果波經》嘅名家華度亦都係咁睇，所以推介阿仙奴下盤。
朗拿度返到皇馬俾教練迪保斯基指佢自命係一級球星，又唔回防。點知朗拿度即刻發晦氣，講到隨時可以投身英超聯咁款，而啲傳媒又話阿仙奴贊助商Nike會撬走佢。我求大俠心諗，兵工廠領隊雲格咁精打細算，點會搵你朗拿度呢件貴貨呀。
德國喺周中友賽輸咗畀西班牙一比三之後，龍門兼隊長簡尼就好激氣，猛鬧班隊友唔生性，淨係顧住球會嘅比賽。雖然我求大俠都認同簡尼嘅說話，不過佢自世界盃後一直好鬼躁，國家隊及拜仁嘅隊友都畀佢鬧勻，希望佢收拾心情打好今晚場慕尼黑打吡戰啦！
列斯對水晶宮呢場英格蘭足總盃，雖然喺星期日先踢，不過列斯個陣超殘就係人都知，除咗有馬迪奧、路錫同埋拉迪比外，連巴基亦喺周中受傷，要休息兩個月，就算有基維爾、班比同埋碧堤可能復出，陣容都唔夠完整。咁究竟《蘋果波經》會搵乜嘢？聽日咪知囉！
呢個世界真係同人唔同命，繼阿根廷球員甘莫蘭尼斯可以代表意大利後，兩個喺葡甲聯搵食嘅巴西前鋒查度同中場迪高都批咗做葡國公民，唔同嘅係查度因為曾經代表過巴西比賽，冇可能為葡國出賽；但係迪高就可以。我求大俠睇過迪高喺波圖嘅比賽，幾有功架，佢好可能會係下年歐洲國家盃葡軍嘅秘密武器。
今次蘋果波神喺「過關三串四」推介英甲高雲地利作客W，梗係啦，高雲地利除咗有中場艾斯迪斯由米記歸隊，重啱啱借得布力般前鋒贊臣，擺明想爭升班。不過，潛質唔錯嘅贊臣竟然敵唔過年過三十嘅約基同高爾，就令人有啲欷歔。
逢周六、日見報