港股噚日早段升過70點，主要係由滙豐（005）帶動，可惜其他股份冇動靜，恒指最後收9201，升28點。港股成交轉靜，成交金額54.3億元，買賣兩閒。
品質國際（243）前日停牌話要配股，不過阿虎就冇諗到品質在市況偏淡，業務前景不明朗嘅情況下，重可以集資逾1億元。品質去年10月，以每股1.50元配售2900萬股，集資4350萬元。今次以1.52元配售7700萬股出街，抽水成1.17億元。
今次嘅包銷商係新鴻基國際，據聞認購反應一般，包銷商自己哽咗唔少貨，而且唔少承配人股票未到手就已經沽貨，搞到品質噚日一復牌就跌逾10%，最後收報1.56元，跌9.3%。市傳有人誓言今次集資後，半年內都唔使再抽水，但亦可能意味幕後人毋須再為配股而托價。
有消息話亞洲鋯業（395）老細楊新民下周來港與芬佬會面兼做路演，月底重會走訪日本。黑客話，楊生此行目的旨在物色策略性投資者，為公司業務注入新資金。亞洲鋯業顧名思義當然是生產鋯，但鋯係乜嘢相信好多人唔知，原來佢係一種耐熱抗蝕金屬，主要用作生產流動電話部件、壓電陶瓷、人造寶石、光纖等，用途幾廣泛，對投資者應有一定吸引力。聽聞此股部署炒上已久，可能快開車。
中外運（598）上市首日表現不俗，主要係有中資熱錢炒作。據聞多間大行會配合唱好，初步目標價3元。中外運所從事嘅貨運代理、速遞及物流等業務，目前仍受國內法規所管制，外資暫難進入與中外運競爭，即使中國因入世而要開放有關市場，但外資要與中外運競爭，起碼要幾年時間。
阿虎