陳煒同商台DJ劉偉恒日前去咗韓國漢城幫亞視節目《韓星閃閃睇真D》拍外景，陳煒重遇到落雪，佢覺得又靚又浪漫。
陳煒見呢次旅程天氣咁凍咁辛苦，就得閒請啲工作人員食嘢。前日陳煒趁空檔去咗漢城南大門買手信，佢買咗唔少韓國零食返香港，沿途有唔少韓國男士口花花撩陳煒。當佢買緊手信時，零食店老闆猛問陳煒係咪模特兒，重猛咁獻殷勤，個中年老闆索性將頭挨落陳煒膊頭度，擺明抽佢水，好彩都唔係太過份，陳煒就由得佢，嗰個老闆後來畀番個折頭陳煒。
此外，陳煒此行重同劉偉恒去咗韓片《我的野蠻女友》拍攝場地新川觀光，佢哋亦即席重演該幕拳打戇男嘅鏡頭。 記者王崇穎漢城直擊
溫碧霞噚日情人節，喺茶果嶺拍電影《斗室96小時》，佢話：「情人節開工冇所謂啦，反正我已經收到老公送嘅禮物，我好鍾意，但係乜嘢我唔講得，而我就送咗朱古力畀佢。」有人取笑佢咁慳，只係送朱古力，佢話：「唔係呀，其實係我老公唔鍾意我送禮物，兩個人相處，大家開心最緊要，禮物都係次要，或者今晚佢可能嚟探班，畀個驚喜我呢？」
薛家燕（好姨）噚日喺屯門出席「皆大歡笑簽唱會」。佢哋除咗唱歌之外，重送出三隻足金金羊。好姨一直手攞住隻自稱「暗戀你的人」送贈嘅熊公仔，佢話：「隻公仔係今朝返到新城電台時，接待處轉送，不過唔知送公仔嘅人係邊個？」相士話佢今年旺桃花，佢話桃花旺就可以有更多觀眾鍾意。
梁小冰噚日同亞視劇集《萬家燈火》監製陳寶華嘅緋聞男友盧慶輝去九龍城拍《萬》劇外景，劇情講述小冰誤會盧慶輝係小偷，不停用雞毛掃打佢，但係唔小心打中盧慶輝個嘴，小冰重取笑盧慶輝話：「今日（即噚日）情人節打到嘴，咁你點咀呀？寶華姐實鬧死我啦！」
三人組合E-kids噚日喺旺角出席活動，有傳成員Tommy（右）讀中五時因為涉嫌偷竊，俾校方要求退學，Tommy話：「以前我唔鍾意讀書，識咗一啲唔好嘅人，自己先會做錯事，呢件事我之前都已同公司交代過。」對於陳年舊事俾人踢爆，Tommy話：「可能因為我做咗歌星，先會俾人揭發呢件事，其實𠵱家我唔煙唔酒，連蒲夜店都少咗。」噚日喺活動現場有歌迷就話：「我哋唔介意Tommy嘅過去，我會支持佢哋。」
