八方早前提過馬會主席夏佳理隻「駿河」年初三首次出賽，但佢冇落注，果然隻馬三甲不入。但大家千祈唔好以佢是否落注為搏殺貼士，因佢素來唔喜歡投注喺自己嘅馬身上，以前佢隻馬王「翠河」贏到開巷，都冇落注。
夏佳理同八方解釋，自己隻馬咁熱，買一千蚊贏幾百，若然真係贏，呢幾百蚊同獎金相比微不足道，但跑唔出，輸多一千更冇癮，所以不如扒吓冷買人哋嘅馬，前晚佢就扑中第三場八百幾蚊隻大冷Q。
夏佳理又教八方莫信馬主貼士，佢話一場十二隻馬出，可能有八個馬主想去馬，如果個個畀貼士你，你信邊個？如果你得一個馬主消息，咁又可能其他七個得手；所以不如諗下另外四隻，博下彩好過。
傳真︰2623-9278
電郵︰