今天是情人節，雙雙對對的情侶，不管工作多忙碌，都會有不同的慶祝方式，共度甜蜜的一天。而娛樂圈中的愛侶亦不例外，本報訪問了七對情侶，他們有些會趁今天情人節與另一半吃一頓浪漫晚餐，或互送禮物表達心意，並公開向情人發表愛的宣言。
而遠在青島拍劇的鄭伊健，更專程趕回港陪不用開工的女友梁詠琪吃燭光晚餐，羨煞旁人。
鄭伊健：呢排雖然成日要去內地拍戲，但今日我一定會返香港同你一齊享受燭光晚餐。上年情人節我哋喺外地過，今年留喺香港一樣開心。到時我會送一份神秘禮物畀你。留意我下一首新歌嘅歌詞啦，我會憑歌寄意，將我對你嘅愛的宣言放入去。
梁詠琪：今日你請我食飯，我就請你食甜品啦！禮物會送我今年嘅演唱會飛畀你，等你可以嚟支持吓我。而我對你嘅愛的宣言，就係「年年有今日，歲歲有今朝」。
郭晉安：我日做夜做做到懵，妳懵吓懵吓做旺嫂！今日我哋都要開工拍劇，你就喺我隔籬廠，大家隔住幅牆，我哋惟有打摩斯密碼傾偈。我會送水晶畀你，因為我知你鍾意。
歐倩怡：丁常旺，我哋快啲返屋企玩洞房啦！講笑咋，今日我哋都要開工拍劇，有時間嘅話，大家就食餐飯囉。
陳奕迅：因為過兩日就開演唱會，連情人節都要綵排，唔可以同你去特別慶祝。今年情人節嘅禮物，我梗係送一個我最精采嘅演唱會畀你睇啦！
徐濠縈：情人節我會喺紅館陪住你，即使係喺工作中度過，但一樣開心。你話送場精采演唱會畀我睇，咁我就送愛心湯水畀你滋潤吓，重有你要記住事事小心，希望你出入平安。
魏駿傑：滕滕，今年情人節我最想同你講嘅，就係我希望每年情人節都可以同你一齊過。我重未諗到買乜嘢禮物畀你，不過到時一定會令你驚喜。
滕麗名：傑仔，今年係我哋第四年一齊過情人節，我最想同你講嘅，係好想可以一齊放假
王書麒：其實我好體諒你懷胎十月嘅辛苦，所以無論乜嘢情況，我一定會喺你身邊支持住，我承諾帶畀你同BB一生一世嘅幸福。
許秋怡：今年嘅情人節對於我哋嚟講意義好重大，因為我肚入面有你嘅BB。我知自己近排情緒起伏好大，但你依然好遷就我，所以我想趁住情人節同你講，無論點辛苦，我答應會為你生一個健健康康、精精靈靈嘅BB。
鍾鎮濤：我想話你知愛情係冇道理嘅，希望有情人終成眷屬。我會送一場好好睇嘅舞台劇畀你睇，我自己做嘅。今日會喺工作中度過情人節，喺台灣做舞台劇《愛情有什麼道理》，今日總綵排，聽日中國情人節開演，你一定要嚟睇。
范姜素貞：情人節我租（祝）你演出神（成）功，我唔會送嘢畀你啦，四年後先講啦。
張智霖：今年中西情人節我都唔可以同你一齊過，因為我喺香港，而你就喺台灣拍劇，不過之前我已經提早送咗一啲首飾畀你做情人節禮物，我對你嘅愛，盡在不言中。
袁詠儀：呢幾年因為要努力搵錢，所以我哋已經有三、四年冇一齊過情人節；不過，我覺得只要兩個人喺埋一齊開心，日日都係情人節。我想同你講，你畀心機做嘢，就係愛我嘅表現。
