地鐵主席蘇澤光劈炮唔續約，八方屈指一數，問責時代短短數月，已經有好多人決定起身，例如積金局總監許仕仁、港交所總裁鄺其志、金管局副總裁簡達恒、房協總幹事蘇慶和；至於證監會主席沈聯濤妾身未明，九鐵總裁楊啟彥最快可十月退休……總之未來半年，陸續有人離任，但迄今未有一個新人蒲頭，除咗田北辰。
一朝天子一朝臣，本來好正常，不過咁多關鍵人物一齊走，真係要保佑香港呢半年乜事都冇至好，否則莫講人才，人手都唔夠。講到人才，廖秀冬前日評論蘇澤光事件時，有兩句說話都幾發人深省：「在合併研究中，人才當然是政府考慮的其中一點，但不會有直接的影響。」局長重話一定會喺行內搵到人才㖭。
（圖）蘇澤光唔續約地鐵，又有好多關鍵人物齊齊起身，真係要保佑香港呢半年冇乜事。
傳真︰2623-9278
電郵︰