二手住宅俾一手樓盤千奇百怪嘅優惠搶去大部份買家，有屯門區地膽代理之稱嘅祥益地產，為咗反擊，出動靚女置業大使Karen胡，推介有新裝修嘅二手單位。
祥益除將新盤現有嘅優惠付款辦法，推廣到二手住宅外，又諗到新橋，游說業主出錢，佢哋負責裝修放盤單位。蘭西睇過，款式都幾時尚，同一手樓有得揮。
今次祥益特別炮製四款裝修單位，公司營業副董事張才華講解，分別有適合一般用家「悠然簡約」設計、為白領而設嘅「優尚雅致」、新婚夫婦嘅「溫馨典雅」，同生意人最愛嘅「高逸氣派」裝修。示範單位設喺屯門區四個地點，包括屯門市中心、屯門碼頭、大興區，同埋翠寧花園。
如果唔想搭咁耐車到現樓，又可以透過祥益姊妹公司敬業地產推出嘅「由你出價」新網頁睇相先，網頁內重會有三名置業大使，提供物業買賣嘅意見㖭。網址係：
今年元宵節緊接西方情人節，市面上節日氣氛濃厚，近期多個新盤亦先後以中、西情人節做噱頭，加入新優惠促銷。就連地產代理同發展商開記者會都要應節，噚日元朗采葉庭記者會，美記特登準備一大束花，送畀新世界發展營業及市務部高級經理何伍燕榆，何太有花收當然高興，可見女士幾時都有着數。
蘭西早陣子稱讚過恒基，為新都城二期貨尾買家執過間屋至交樓，但最近聽到一單同佢集團有關嘅烏龍嘢，主角係中華煤氣。
話說有買家承咗個有裝修嘅二手單位，入住後，搵煤氣公司駁喉開煤氣。點知職員話，個煮食爐唔合規格要換，兩塊工作枱面都唔留得。
之後，同煤氣公司掛鈎嘅裝修公司職員上門，睇完後口頭報價，要先錢後貨。業主即刻去煤氣門市部畀錢。其間工程出現失誤，但當搞掂一個禮拜後，竟接到煤氣公司追收尾數嘅電話。了解之下，原來計漏一塊工作枱面錢。業主覺得，貨物既已出門，錢又先付了，這樣一來大失預算。最後一人讓一步，裝修公司不收工錢，戶主只付料錢了事。
環保乃大勢所趨，究竟點先環保？商界環保協會舉辦嘅「香港建築環境評估」評級獎，就為環保商廈定出標準。自問夠料嘅商廈，可向該會申請評級，分為優秀、優良、良好及尚可四級。
聽講至今只得17座商廈送交評審，但攞到優秀評級嘅唔係咁多，中環中銀大廈，係其中之一。呢幢89年落成嘅名廈，係自出貝聿銘手筆。
中銀屬下新中物業管理講，佢哋用咗幾年時間，提升物業質素及管理運作水平，先至申請評級，結果獲得最高評級，認真威水，對貝老可謂錦上添花。
評審主要由設計、運營、保養及管理幾方面去評定，當然重要實地考察啦。
攞到呢個獎後，中銀重有意申請ISO環保驗證，每年接受審核，維持喺最高環保水平。
電訊盈科花費八千萬元興建及包裝嘅數碼港貝沙灣示範單位連博物館，噚日曝光。電盈竭力將法國南部度假風情滲透項目內，遠赴法國尼斯同摩洛哥之間嘅古堡，拍攝廣告片，重邀得台灣著名導演陳宏一製作，男主角由有吉隆坡王子之稱嘅BryanSia擔當，女主角就由歐日混血兒MiyukiFox擔演。聽講淨係呢段片長60秒嘅廣告片就使咗過百萬元，噚晚喺電視首播。
電盈對貝沙灣非常重視，示範單位同售樓處金碧輝煌不在話下，參觀人士恍如走進博物館，古董陳設，目不暇給。示範單位最特別係主人套房浴室同埋廚房都設有電話，浴室坐廁旁邊重有雜誌架，設備果然夠體貼。
多個豪宅新盤齊齊登場，氣氛熱烘烘，準買家眼福不淺。向來出品優質豪宅嘅新鴻基地產，何文田山一號打頭陣後，堪稱其姊妹盤嘅土瓜灣農圃道18號，準備乘豪宅氣勢高漲下緊接推出。新地預先為該盤做小冊子，介紹軟性資料。聽講，會所設備係發展商賣點之一，冊子裏面重模擬會所嘅入口大堂，大盞水晶吊燈高高掛，都幾豪氣。
蘭西
電郵地址：
