今日係二月十四，聽日又到元宵佳節，一連兩日中西情人節，大家有乜嘢節目呢？八方噚日同幾位立法會議員傾開，最浪漫要算張文光，佢打算今日一早買紮粉紅玫瑰，夜晚同太太燭光晚餐。今日買花唔怕貴咩？張文好豪氣咁話：「一年得一次情人節，咁都要計？」
記者又問金王胡經昌會送乜畀太太，佢見到霍震霆行過，竟然爆響口：「問佢啦！佢今日就飛啦！」
記者梗係咬住小霍唔放，迫問佢情人節係咪會同靚太太朱玲玲外遊過二人世界？小霍笑容尷尬，又唔敢否認，惟有埋怨出賣佢嘅胡經昌「咁多口㗎！」一向唔派利是嘅霍公子，唔知係咪想塞住記者把口，一句「怕咗你嘞！」塞咗封利是畀記者就走人。
比起上嚟，女議員嘅情人節就相對失色，周梁淑怡話佢嘅「情人」今日不在香港，重話自己結婚三十四年，對情人節已經冇晒期望。咁都會收到花啩？周梁一聽就笑：「你唔講起，我都唔覺自己咁淒涼，計落都有好多年冇收過花嘞！」周生，識做啦！劉慧卿更加係工作狂，今晚竟然賣甩老公，約「民主力量」同「民主網絡」食飯。至於立法會主席范徐麗泰就話明今日老公唔會送花，只會一家人食飯、賞香港夜景。
八方行過中環最近立法會嘅花店Petals，老闆娘話呢幾日生意滔滔，噚晚重要做通宵，花價就冇加到，一打玫瑰連送貨八百八十蚊。
傳真︰2623-9278
電郵︰