上星期六賽馬，方祿麟馬房贏出「濟濟精神」、「得令威」一對孖寶，「濟濟精神」賠率有十倍左右，「得令威」本來亦有二十倍，過關飛一開，賠率立即急跌至四倍，全場嘩然，馬會立即宣佈有巨額過關投注射落「得令威」，所以賠率急跌。當時左丁山諗，「濟濟精神」係聖方濟書院校友嘅團體馬，副校長陳祖雄係成員之一，教師校友一向好少賭錢，斷估唔會係佢哋落飛去「得令威」啫。唔通係方祿麟馬房中人？冇買得咁大啩。
事後散場，財經編輯K大喊走寶。原來編輯K當日冇入場，佢老公坐響會員席四樓西餐廳（ThePaddock百達廊），隔兩張枱有一位中年人，買一萬蚊一注三串七共投注七萬，就係「華東之寶」夾「濟濟精神」夾「得令威」，中咗頭兩關之後，中年人已經知道收梗一百六十萬以上，大聲講，周圍都知佢過第三關「得令威」，所以「得令威」賠率急跌至四倍，後來冇人信，賠率慢慢升番上十倍，到開跑嗰陣，人人都為佢緊張，結果順利勝出，壓倒大熱門「爪皇烈風」，呢位中年人收成二千萬元以上，「百達廊」急call實Q上嚟護駕，呢位仁兄當然係收支票，但另外收幾吋高啲一千蚊紙，當係新年利是咁派畀百達廊夥計，廚房都有份，本來馬會人士唔可以收錢嘅，但碰啱新年期間，夥計可以收利是收到十五號，於是中年人派得開心，夥計收得過癮。編輯K話如果佢在場點都會跟風買番幾百蚊「得令威」，收番幾千銀都好吖！