煲呔噚日喺官邸搞新春酒會賀羊年，人群中出現一位稀客：大明星黎明，唔使講梗係馬上成為焦點啦。煲呔嘅靚女新聞秘書朱曼鈴負責做導遊，帶黎明喺煲呔官邸睇咗個圈。原來今次係黎明第一次到訪山頂嘅政務司司長官邸，所以表現特別興奮，問東問西，連官邸夜晚開唔開射燈都八卦一番。至於官邸花園一池錦鯉，亦成功吸引黎明。黎天王同身邊人寒暄時主動話：「司長嘅錦鯉好肥。」
不過，八方打聽到，黎明作為電影人，始終掛住電影業，所以最有興趣嘅問題係官邸有冇借過畀人拍戲，會唔會借畀人拍戲？官邸以前當然冇上過大銀幕，成日話推動香港電影業嘅特區政府唔知今後會唔會諗諗。
（圖）黎明第一次到訪煲呔嘅山頂官邸，興奮到問東問西，成個大細路咁。 資料圖片
傳真︰2623-9278
電郵︰