恒指前日升120點，昨日跌凸，散141點。一聲拉登錄音帶話係真嘢，美股又跌過，港股又受到拖累，輪到啲Put輪意氣風發。恒指收9173，兩頭擺，上次低位9072，又有可能再試呢個位，不過咪太悲觀，跌得太多之時追揸Put輪唔係好着數。
九倉（004）近日波幅唔細，前日升45仙，昨日跌夠65仙，幅度有3.9%，隻熱門Call輪9476自然冇運行，前日升11%，昨日跌17%。睇住正股，再跌3幾毫，即買啲9476博反彈。隻輪今年6月夠鐘，現價20.7仙，啱啱平水，槓桿率有7.7倍。點解咁早就冇晒溢價？原因之一係個市係淡底，原因之二係九倉例牌喺5月除息（3月中左右派成績表），上年末期係50仙，正股除息後隻輪至夠鐘，除息因素計埋在內，隻輪實係有溢價3.2%。
思捷（330）派半年成績表，多賺44%，市場收貨，股價曾創新高，收15.95元，升4.2%，兩隻相關Call輪跟正股升。9610收34仙，升17%，市場貨唔多，得15萬銀交易，5月到期，溢價4.4%，槓桿率4.7倍。9613收37仙，升12%，交投更少，金額11萬銀都唔夠，今年11月到期，溢價10.2%，槓桿率4.3倍。思捷累積升幅唔細，兩隻輪又相當冷，追唔過。
章 盛