情人節，不一定要跟風作狀甜蜜蜜，不如讓我為離群暗自消愁的你，度下情人節七宗罪，尋吓開心。
情人七宗罪，第一罪係complaincomplaincomplain。抱怨一次就夠皮，審時度勢，家下乜環境，一而再、再而三的complain，實在太自大，唔抵惜。這種情人，除非你暗戀董1A類型，否則，應該馬上定罪，劈炮都劈唔切。第二罪係招積。道歉鞠躬九十度，勉勉強強，擺明做騷。這種情人，渾身散發高官味，除非你是局長高官擁躉，否則，即飛出局，咪阻碇。第三罪係當黑。情人腳頭唔好，累你執支下下籤，全年冇運行。香港唔衰得，這種凡事不吉型情人，唔該速遞去金正日總統府，有咁遠得咁遠，唔好黐埋身。第四罪係無料。開口埋口，都是廢話，情人情話，十足施政報告，令你逆市感覺慘情多七成，當然要果斷斬纜，叫佢shutup。第五罪係樣衰。情人談的是情，不是推銷廿三條，不是出版民意匯編，藐嘴藐舌的面部表情，會令你的性能力跟經濟與法治的前景一齊倒退，制唔過。第六罪與第七罪合併為問責虛有其表。情人大難臨頭腳軟、卸膊、閃！要來做乜？推搪失責的情人像無良庸醫，受夠了恐嚇與斷錯症的你，無謂落疊。