年年一到情人節，玫瑰花、情侶套餐價格都例必暴升，喺香港過最低消費都要幾百蚊，今年經濟不景，想縮皮又唔想俾女朋友覺得你寒酸，不如轉移陣地返深圳慶祝，其實深圳有唔少餐廳都有情人節套餐食，而我就知道有日本料理同西餐廳，只要畀?150就可以有燭光晚餐、禮物兼表演，慳慳哋過情人節話咁易!
記者：黃希知 攝影：Manny
ImageGirl&Boys：Ricky、思思、Sammie
逢星期一至三、五刊出
深圳有好多食肆都勁推情侶套餐，而仙人掌音樂餐廳為吸引更多港人幫襯，特別推出優惠情侶套餐，只要客人出示八達通卡，就可以?150食到原價?199有五道菜嘅情侶套餐，重有中、西兩款任君選擇，加埋一連串特備節目同鮮花禮物，咁就唔使大傷腦筋啦！
外形吸引嘅火龍果沙律，主要材料有新鮮火龍果肉、澳洲帶子、日本八爪魚仔、蟹柳等不同海鮮，清甜火龍果肉味道同海鮮可以話係絕配，用挖空嘅火龍果載住，賣相精緻，同貴價餐有得揮！
食完一輪頭盤，都差不多填飽半個胃，主菜再來一份銀雪魚拼羊扒就啱啱好，銀雪魚扒輕輕調過味後煎香，新西蘭七枝骨羊扒肉嫩味鮮，為保持原汁原味，大廚只用法國芥辣稍為辟去羊肉的羶味，再輕輕一煎，肉汁依然，伴以鮮味銀雪魚，不太膩，配搭得不錯。
■現場除咗有拉丁樂隊同小提琴、結他演奏外，餐廳重特別邀請咗攞過世界調酒冠軍嘅調酒師即席表演花式調酒，節目有動又有靜，唔怕會悶親！
電話：(86)75582472666
地址：深圳市八卦一路藝華大廈617棟1樓
營業時間：上午11時至凌晨2時
情人節唔一定要鋸扒，今年不如轉轉口味，帶女朋友去食日式情侶套餐，話唔定重可以令佢驚喜，好似忍者居推出嘅情侶套餐，兩個人?150有找，食完重有玫瑰同神秘禮物一份，又可以同忍者影番張相留念，夠晒經濟，又可以畀女朋友一個驚喜，一舉兩得！
前菜先來一個龍蝦沙律，我驟眼睇重以為真係龍蝦拑，原來係仿龍蝦肉，唔單止樣似，連味道都幾似。食完前菜，係時候送玫瑰花，但今次朵玫瑰係由師傅落重本用新鮮三文魚砌成的花之戀壽司，用飯糰同蟹子、蟹柳、青瓜絲做的沙律作花蕊，賣相吸引，冧女朋友實掂！
鐵板煎三文魚(下)
情人節套餐以各款日式招牌菜式做組合，其中有炸蝦天婦羅拼炸薯茸，「我依照正宗嘅日式做法嚟做薯茸，牛油味會較重，食落好有日本風味。」師傅Henry表示。薯茸加入鮮奶、牛油、雜菜絲、冬菇、大葱絲等，蘸上麵包糠炸至外層金黃香脆，食時淋上吉列豬扒汁，確有日本風味！而三文魚扒則將半肥瘦的三文魚烤至八成熟，肉質嫩滑保持肉汁，配上用蝦熬成的海鮮汁，重好過鋸塊高脂牛扒！
電話：(86)75582298990
地址：深圳東門新園路一號中海商城3樓
營業時間：上午11時至午夜12時