港股前日表現靚靚，點知噚日即時跌番轉頭，連9200都守唔住。市場傳出電盈（008）旗下貝沙灣可能會劈價套現。電盈一直向外界話訂價約在每呎5100元，但經過收購通告事件，電盈管理層誠信備受質疑，貝沙灣會否真係以呎價5100元水平開售，實在好難再信。地產股噚日全線下挫，長實（001）跌2.8%，收48.80元，恒地（012）跌2.6%，收22.35；新地（016）亦跌1.3%，收45.30元。
如果地產商可以平買平賣，根本唔怕劈價賣樓，不過孫公除咗表面上出9招救市外，其實暗地裏亦在補地價方面做工夫，刻意將叫價提高，令到發展商不能以低價吸納土地，雖然政府一年後恢復勾地，但到時孫公又可以話地產商出價唔夠高而拒絕勾地申請。現時，大部份發展商仍有財力承受存貨積壓，不過，樓市疲弱情況再唔改善，地產商會十分頭痛。
華能（902）4間電廠電費下調，但華能股價不跌反升，噚日曾升至7元水平，收報6.85元，升2.2%，成交增加至1.23億元。Cookie話，減電費大家預咗，不過噚日公布嘅減幅介乎1至2%左右，比市場預期5至10%細得多，因此大戶當好消息炒。
噚日市場傳出德昌（179）會向通用收購部份業務，作價高達60億元。呢個時候斥巨資進行收購，德昌都算藝高人膽大，但股價有理無理先跌3.9%，收8.65元。不過，現時大家都對經濟前景悲觀，要買平貨正係時候，德昌此舉，或多或少反映管理層認為全球經濟已經見底。
阿 虎