上星期報道過嘅《真．三國無雙3》，遊戲確定會由PLAYSTATION2代理商訊源獨家分銷，而遊戲除咗會同日本同步喺2月27日發售之外，隨首批遊戲重會附送連日本版都無嘅3D立體海報，極具珍藏價值。至於遊戲內容會同日本版一樣原汁原味，當然唔少得精美嘅中文說明書啦！限定版就會附送日本舖頭先有嘅巨型掛旗同亞洲區先有嘅特典，有興趣嘅好一早去訂定喇。
自從EA代理咗SQUARE遊戲之後，SQUARE遊戲賣價再冇以前咁炒到上天，貨源穩定得益嘅當然係用家啦。日本定價7,800日圓（約港幣$500）𠵱家行貨唔使$400重有Yuna限定手機繩送，真係冇理由唔買行貨。遊戲3月13日推出。
獲獎無數嘅XBOX遊戲《HALO》係前兩日見街，今次廠方更加入中、英文選擇，定價$299，之前炒咗一排嘅XBOX《HouseofDead3》，𠵱家灣仔東方188DreamStore槍連Game都係賣$810，有興趣不妨睇睇。
手提機霸主任天堂，今年搶錢第一彈GAMEBOYADVANCESP，終於喺噚日登陸香港，普通版賣到十算（$1,250）都有價有市，真係唔好話香港經濟差。而日本限量20,000套嘅珍珠白GBASP連《FFT》限定版就明天到港，不過批發透露貨源極少，相信市價要成$1,600至$1,700先有交易。