意大利前日響友賽砌低葡萄牙，教練查柏東尼總算唔使再俾國內傳媒鬧。最緊要係佢用嗰幾件新人都對辦，變相向幾個成日唔係稱傷避戰，就係對老查諸多意見嘅大牌球星施壓。睇怕韋利、托迪會開始着緊番啲。
除咗入波嘅哥拉迪外，其實米高利、甘莫蘭尼斯呢兩件新丁都踢得好，意國傳媒重形容米高利「好似法拉利咁轟隆起動」，再加埋質新嘅柏路達都肯定聽教聽話。講真，老查未必真係重用佢哋，但至少可以靠佢哋鞭策幾個大牌球星。
提起甘莫蘭尼斯，佢列隊時堅持唔肯唱意大利國歌，本來屬人之常情，不過意國傳媒成日攞呢樣嘢大做文章，贏波就冇人計較，遲吓唔覺意輸波實有排嘈。
前日中巴對抗比賽過後，巴西李華度被選為最佳球員，攞到架靚車。不過我求大俠聽聞有關方面事先張揚如果巴西入唔到波，就唔會送二百萬人民幣獎金畀最佳球員，所以李華度車就到手，錢就唔可以袋袋平安。睇番場波，李華度已經係巴西隊踢得比較積極嘅一個，射過幾腳波，怨就怨腳風唔順，同埋起腳嗰吓花巧咗啲。
德國前日作客西班牙輸一比三，可以話係被人技術擊倒，就算入嗰球波都係靠高空波滾吓滾吓撞入網。波碧已經連續兩場國際賽入波，咁啱兩次佢被換出後德軍即刻唔掂。你固然可以話波碧翻生，但亦反映備受傷患困擾同埋青黃不接嘅德國冇兵可用，要依賴呢件過氣猛將撐場，真悲哀。
處於危急存亡之秋嘅巴塞隆拿，佢哋會長加斯柏終於為球隊着想，唔等到三月一日就辭咗職，連呢周作客愛斯賓奴嘅同市打吡大戰都可能再唔係座上客。我求大俠不嬲都話加斯柏係搞到巴塞咁嘅罪魁禍首，但係亦好欣賞佢今次撇除個人私慾嘅慷慨就義精神，顯示佢都係以巴塞為先，話唔定今次班球員會因為佢打番場好波㖭。
美國高中球王勒邦占士到底有幾紅？喺上個禮拜五美國拉斯維加斯莊家BoDogSportsBook&Casino，破天荒專登為占士開咗個盤口，估呢個被公認為今年嘅NBA新秀狀元將會簽邊一間波鞋公司。我求大俠上咗呢間莊家嘅網頁昅昅，發現𠵱家最多人估勒邦占士將會過檔Nike，賠率係一點五倍，咁都有得賭，認真巴閉。