台灣男子組合F4噚日結束喺新加坡嘅世界巡迴演唱會，跟住搭飛機去馬來西亞，準備今日喺大馬舉行一場「2003馬來西亞F4Fantasy世界巡迴演唱會」，順道同大馬歌迷共度浪漫嘅情人節。不過，新加坡嘅歌迷好唔捨得F4嘅離開，佢哋特別去機場送機，有啲女歌迷為咗親近偶像而做咗滾地葫蘆，重有歌迷包咗四架大巴由新加坡去大馬見F4。
F4四子言承旭、周渝民（仔仔）、朱孝天同吳建豪噚日朝早到達大馬機場，吸引咗好多歌迷接機，fans都準備咗禮物送畀偶像。之後，F4四子出席宣傳個唱嘅活動，大馬傳媒問到四子被指喺巡迴演唱會咪嘴演唱，四子中嘅吳建豪反應最大，佢用國語話：「我們有否對嘴，明晚（即今晚）大家欣賞演唱會就知道。」吳建豪更即時黑面。反而朱孝天就打圓場，佢話：「我們到不同地方開演唱會，所用的器材都不同，因此可能會遇到不順利的情況，但肯定我們沒有對嘴。」
苑瓊丹噚日去咗台灣為無綫劇集《皆大歡喜》做宣傳，佢着住一件紅色嘅吊帶背心，酥胸半露，性感誘人。問到苑仔喺台灣宣傳賣大包，唔怕男友睇到會詐型？苑仔噚日喺長途電話話：「我都唔知啲消息可以咁快，或者佢睇唔到報紙，聽日（即今日）情人節雖然同唔到男友一齊過，但我哋事前已經交換咗禮物。」
安雅早排喺台灣發生交通意外，整傷塊面，縫咗四十七針。佢前晚綵排舞台劇《拜金一族》，喺劇入面安雅講全英文對白，其中一場戲講外籍男主角問佢叫乜嘢名，佢就好激動咁講粗口鬧人。安雅前晚排戲時都好投入，排完戲之後搭的士離開，重同記者講話唔會去其他地方，只係返屋企。
林敏俐選港姐之後，第一套劇就係拍《美麗在望》，一開始就同人氣藝人郭晉安合作。噚日林敏俐重同安仔有場對手戲，係講林敏俐要打安仔一巴，第一次拍劇就打人，林敏俐話好唔慣，佢噚日喺將軍澳電視城話：「第一次打人真係有少少擔心，真係驚打親人，好彩安仔教我點樣打佢，好彩打咗兩巴就OK！」
梁漢文自從約滿華星之後，最近傳出佢落實加盟黃栢高嘅金牌經理人公司，同埋簽約EMI做「一哥」。
梁炳已經有一段時間冇新歌推出，不過今日佢會有一隻全新歌曲《501》派上台，梁炳覺得對於有呢個機會，係○三年嘅一個好開始，佢重話自己會發揮小宇宙，今年許勝不許敗！
