郭羨妮與溫兆倫拍拖幾個月，感情一日千里，兩人早前去完馬爾代夫旅行後，上月底又雙雙飛往加拿大工作兼避年，郭羨妮更偕同男友返母校參觀，重拾不少校園生活的回憶。
特約記者梁海平加拿大直擊
郭羨妮（Sonija）在農曆年前偕男友溫兆倫到加拿大溫哥華旅遊及為無綫製作的賀年節目擔任司儀，由於溫兆倫是首次到加國，所以Sonija亦一盡地主之誼，陪他到處遊玩，而最特別的是她帶了男友返母校參觀，在溫哥華逗留了約一個星期後，溫兆倫因為要去紐約工作，所以暫時與女友分開。
日前Sonija在加拿大的母校SimonFraserUniversity接受訪問說：「以前喺呢度讀書，真係留低咗好多好嘅回憶畀我，𠵱家重遊母校，感覺一樣係好愉快。」
郭羨妮在加國讀書時是優異生，當時她主修心理和經濟學。Sonija說：「讀書嘅日子可能因為開心，所以過得特別快，𠵱家我返到嚟發覺呢度嘅一切同以前分別唔係好大，早兩日我都同溫兆倫嚟過呢度，我話畀佢聽好多以前讀書時嘅趣事，我同佢淨係講以前讀書嘅生活已經有唔少話題。」
今次返母校，郭媽媽亦有陪伴在側，而她對溫兆倫的印象亦十分之好，至於郭父因為忙於在內地做生意，今次在加拿大與溫兆倫緣慳一面，但郭羨妮稱：「爹哋雖然唔喺香港，但佢知道我哋拍拖亦冇反對。」
