德昌電機（179）噚日在可能有大型收購嘅傳聞下，股價大跌3.9%，收8.65元。小初擔心，原本炒到㷫烚烚嘅小型工業股，炒賣氣氛可能受到影響，但經紀黃就叫小初淡定，皆因𠵱家芬佬只係買咗少少貨，有排都未收手。
其實芬佬買小型優質股，唔單止傳統工業股，消費股亦係佢哋嘅對象，好似賣化妝品同搞美容院嘅莎莎國際（178），股價就愈升愈有，成交亦慢慢增加，噚日再升4.39%，收0.95元，成交金額191萬元。
莎莎股價1個月內，由0.71元升至噚日收市0.95元，走勢十分強勁，股價又創52周新高。
記得舊年年中，莎莎公布全年業績，因為左撇帳右撇帳，搞到勁蝕7千幾萬元。
不過，舊年12月公布中期業績已經轉虧為盈，賺咗3千幾萬銀，加上公司又主力針對購買力強勁嘅大陸旅客，所以睇嚟今次全年業績表現唔會差。家陣有芬佬入定貨，斷估佢哋都唔會走眼。
慕容小初