大市明顯轉強，噚日早段略為低開，午後升勢轉急，接近高收，恒指升破前日高位9285，收9314，大升119點，成交66.5億元，係1月24日以來的高紀錄。期指表現更強，高收9310，大升159點，低水亦由44點收窄到只得4點。
恒指重上9300，短期能守穩其上，則初步形勢已轉危為安，但向上仍是阻力重重，9400同9500呢兩個都係關口，至於9600更唔易升破。圖表派朋友話大市短期到底，會否開展新升浪，仍要睇升後調整，能否在9100之上獲得支持而定。9600係去年中開始形成的大型複式頭肩底的頸線，調整後若破位而上，而又有逾80億元的大成交支持，則中期升浪便可確認，今年可見11500至12000。
國企股強勢畢呈，國企指數大升45點，又係中石油（857）同中石化（386）嘅功勞，前者升4仙，後者升3仙；石化類亦有睇頭，儀征化纖（1033）同北京燕化（325）繼續上，前者升5仙，後者升3仙，呢兩隻股份已大升兩日，至於火車頭股上海石化（338），則繼續在高位整固，噚日收1.44元，升2仙。儀征同燕化已齊齊創出今個升浪新高，上石化亦唔會㩒得幾耐，𠵱家走勢形成旗形，1.45元阻力位一破，短線可見1.65元，中線目標為1.8至2.0元。
上石化係基金股，佢哋中線睇得好好，係每逢調整便可低吸嘅對象，以迎接每一個升浪。
紅籌股以華潤置地（1109）特別標青，高收1.01元，升6仙，成交更大增至1280萬股，有動力支持而突破大型三角形阻力，出現入貨訊號，短線目標1.20元，中線可重上1.4元，亦即去年年中長達3個月徘徊區的底部。
華潤置地以發展物業為主，02年上半年因只售存貨，營業額大減，但受稅項及少數權益影響，盈利9721萬元，仍增5%，受業績影響，過去半年股價只能在低位徘徊。不過，去年下半年推出3個新盤，售樓收益大增，估計可套現14億元，全年盈利增長料可再現雙位數。以預期PE7至8倍計，在業績宣布前後，股價理應有強勢表現。
郭兆誠