小初前日講過，有芬佬四圍向優質小型工業股求貨，同時亦有公司向芬佬大送秋波，希望有芬佬要貨，可以谷高股價。噚日成交急增嘅亞洲鋁業（930），據聞亦係和芬佬要貨有關。
亞洲鋁業噚日最高見過0.79元，收0.77元，升7%，成交金額高達4604萬元，但細心睇清楚，其中有3400萬股係非自動對盤成交，造價分別係0.67元同0.68元，明顯係芬佬要貨嘅迹象。
芬佬一次過要咁多貨，所以作價有多少折讓十分正常，但正如之前講過，股仔有芬佬揸住，聲勢會唔同晒，後市可以睇好此股。
經紀黃話，亞洲鋁業近呢一年，十分努力做推廣活動，吸引投資者注意及增進彼此關係，今次有基金求貨，算係求仁得仁。公司稍後會繼續做推廣，包括飄洋過海做路演。
至於下一隻會受基金青睞嘅股仔，經紀黃就估係太平洋恩洋（1174），隻股噚日升4.6%，收1.13元，係52周新高。
慕容小初