美股雖然下跌，但港股就好少理，恒指噚日大幅造好，升119點，收報9314，成交66.5億元。港股主要由長和系帶動造好，長實（001）升3%，和黃（013）升2.7%。超人近期頻頻斥資增持長實及和黃，唔通係想幫和黃在歐洲推出3G業務造勢？如果真係咁，超人都算唔話得。
雖然近期成日有大行唱淡汽車股，話國內汽車市場可能爆發減價戰。不過，汽車股仍愈升愈有，華晨中國（1114）噚日大升10%；駿威（203）升3.25%；慶鈴（1122）升9%。打算在浙江搞汽車合營企業的國潤（175）亦大升逾17%，但早前話入股西安秦川汽車嘅比亞迪（1211），近日升至15元水平後就再冇乜進帳，投資者好似有少少歧視。
雖然東亞（023）業績差，且被一眾證券大行調低盈利預測，不過噚日股價大幅反彈4.3%，收復前日唔少失地。阿虎見到大摩有橫手盤吸納，高盛雖然叫客換馬至恒生（011），但亦掃番唔少貨。阿虎問黑客原因？黑客話，前日可能有人沽過籠，所以要補倉。加上東亞約在半個月後派末期息，每股0.35元，以噚日收市價14.60元計，相當於年息近2.4厘，對好息之徒頗有吸引力，除非美伊開戰，否則此股短期會企硬。
東方有色（230）噚日停牌，市傳公司獲投資者洽購及重組，刺激東方鑫源（1208）股價一度狂升43%，收報0.165元，仍升38%。東方鑫源作為東方有色嘅好姊妹，當然要大事慶祝一番，況且東方有色都有人吼，東方鑫源應該唔會執輸。
阿虎