陳冠希（Edison）新廣東碟《HitsorMisses》今日推出，由Edison自己構思封面同歌詞集嘅主題，佢之前講過想以「中同唔中」嚟形容隻碟嘅歌同佢嘅新聞，除咗扮中箭影相外，隻碟嘅包裝都係個槍靶。
喺拍攝嗰陣，着住皮褸嘅Edison攞住碌棍嚟影相，然後工作人員再照住呢張相，用電腦畫到佢揸住支槍，印喺紙板度。當唱片打開時，張卡紙會彈起，感覺好似練靶場啲槍靶咁。
Edison重以劍擊同打拳造型影咗輯相放喺歌詞集度，佢話：「劍擊要刺中目標先得分，打拳都要打得中先得㗎嘛，切合主題囉。」
Edison喺情人節前夕出碟，佢特登拍咗個半小時嘅迷你愛情電影《愛的魔物語》，隨碟附送畀歌迷，電影裏面Edison係個花弗設計師，遇到個硬直爽朗嘅女仔，同人打賭兼向女仔展開追求，最後真情投入愛上對方，Edison話：「個角色都幾似真實嘅我，因為有好多緋聞，啲人以為我好花弗，其實我對感情同工作都好認真㗎。」
蒙嘉慧（YoYo）早排因為撞傷下巴同後腦，休息咗一陣，噚日佢開始投入工作，YoYo下巴縫咗十幾針，但噚日喺九龍塘出現時，只見YoYo用膠布貼住個傷口，佢話：「醫生都話我傷口埋得幾好，不過如果我唔用膠布貼住傷口嘅話，就會有血水滲出。」
李心潔噚日喺商台接受《樂人谷》錄音訪問，佢啱啱喺馬來西亞過完年就即刻投入唱片宣傳工作，佢話今年最大嘅願望係可以談戀愛，因為佢已經成兩年幾冇拍過拖，雖然𠵱家都有唔少人追求佢，但佢暫時都未有心水選擇。李心潔重話喺今個農曆新年荷包亦大出血，佢請咗成三百幾位客人食飯，順道分享自己獲得金馬獎影后嘅喜悅。
男子組合Boy’Z噚日去新城電台做訪問，關智斌（Kenny，右）對於被影到同前女友食飯行街，佢有備而戰咁話：「嗰個係我朋友，唔係前女友，嗰個女仔都有男朋友，我睇完報道都覺得好好笑。雖然我都有同前度女友聯絡，但真係唔係影到嗰個。」
啱啱踏入羊年，娛樂圈即傳出喜訊，今次嘅主角係陳錦鴻同拍拖多年嘅港台DJ杜雯惠宣布結婚，其實早前杜雯惠已經喺電台節目度講過話今年係最後一年收利是！噚日陳錦鴻同溫碧霞喺太子出席電影《斗室96小時》嘅開鏡，陳錦鴻就正式宣布今年結婚，但係佢就話好多細節都未定，總之就一切從簡。
陳雅倫噚日第四度為一單同攝影師嘅小額錢債案上庭，最後都係冇結果，個官就話雙方嘅證供有矛盾，所以要再排期上庭。陳雅倫話：「我都唔係第一次打呢啲官司，之前同華星份合約，重有稅局都係我親自上庭同個官講，我唔覺得今次單案有問題，我未追究佢重告番我，真係唔驚呀！」
