美股周二晚初段升得好地地，點知格老唔係如傳言所講唱好經濟，反而係唱淡，後尾加埋拉登講嘢，美股結果再散過，杜指跌77點，收7843。
噚日諗住港股冇運行，點知恒指低開後挾上，升119點，收9314，為踏入羊年以來，單日最大升幅，而且成交增至66.5億元，有番啲氣勢。
恒指以大陽燭升破10日線阻力，噚日高位9334，仍受制於近期頂部阻力位，恒指1月27日有個下跌裂口9416-9326，而20日線目前亦在9416，因此趙飛雲相信恒指不易升穿9400，尾市於0.204元買入10萬份恒指Put輪9587當洗濕個頭，至於點解唔揀9556，因為預咗今日恒指可能再挾上，9587槓桿率細啲，就算捱打都冇咁傷，底線係恒指確認升破20日線止蝕。
趙飛雲急於上車有原因，因為港股行先美股好多，如果美股噚晚再大跌，港股今日開市可能會急挫，到時又冇水位上車，所以小注先上車，睇中就繼續加注，睇錯就止蝕離場。
新地（016）果然成為今次反彈嘅先鋒，噚日率先以大陽燭升穿20日線阻力，睇勢將挑戰50日線47.25元。不過，暫時睇唔到地產股基本因素有改善，估計屬技術反彈。滙豐（005）未發威，淡友唔使驚，假如連滙豐亦確認升破20日線84.50元，則可能係另一個故事，要重新檢討整個市勢，甚至轉做好友。
趙飛雲