薛高自從執教咗日本國家隊後，成績就未見突出，結果再次同日本足總要求搵幫手，其中一個原來係佢大佬，實行兩兄弟一齊搵日圓。
日本去年兩次友賽喺主場都重未開齋，而下個月要到美國踢三角賽，薛高當然要諗辦法點樣可以帶起隊波，交成績出嚟，結果決定再推薦大佬伊度加入國家隊教練團，最後亦被日足總接納，預料會出任技術總監一職。
伊度近年都只喺巴西自己間足球學校教波，今次有機會做國家隊技術總監，真係多得細佬關照，但據我求大俠所知，呢位仁兄都曾經教過日職業聯賽球會鹿島鹿角，都叫做對日本足球有認識，薛高明益自己人之餘，起碼都算有啲良心囉！
意大利總理兼AC米蘭會長貝盧斯科尼早兩日提出幾項振興意大利足球建議，包括換人可以換多過三件、聯賽和波就互射十二碼分勝負，希望帶來新鮮感同刺激。求大俠聽完即刻標冷汗，喂，聽講和波射十二碼呢家嘢out到連J-League都唔用囉喎。總理先生係咪搞得政治多唔熟足球大勢？不如專心從政啦。
喺德甲一蹶不振嘅利華古遜前日召開危機會議，據高層講會議結論係就算隊波禮拜六喺聯賽贏到羅斯托克，都唔代表教練托比慕拿唔會被炒魷。計我話托比慕拿聽完唔洩氣就假，重邊有心機教波，話唔定因為軍心不振搞到隊波喺禮拜六輸埋。利華古遜話事人不如一早炒鬼咗人算啦。
富咸最近就有意放棄現有同乙組昆士柏流浪共用嘅蓮花路球場，計劃下季同車路士共用史丹福球場作為主場，希望可以增加門票收入。不過，依我求大俠所見，以史丹福今季草皮咁經唔起考驗，若果增加使用量，肯定一季要換幾次草皮，到時重更加唔化算；你睇上次查爾頓投訴史丹福嗰場唔掂就知啦。
熱火教練萊利因為批評球證，噚日俾NBA罰咗二萬美金，計埋之前俾聯盟罰咗嘅五萬，一共唔見咗成七萬蚊美金，你都咪話唔肉痛。不過萊利之後引用咗一句邱吉爾嘅名言：「我雖然唔係獅子，但我係激起獅子怒吼嘅人。」據我求大俠推斷，萊利其實係拋磚引玉，目的希望班球員化悲憤為力量，都可謂用心良苦囉！