廣東省近日爆發肺炎恐慌，當地市民人心惶惶。而人氣十足的「阿旺」郭晉安，碰巧後日元宵將前往廣州登台，但他表示無意取消行程，製作單位亦特地將保險加碼。而今次「搵命博」的阿旺，為怕一身「酸餿」無意搶購白醋，只會改以香薰殺菌，反而其女友歐倩怡則非常擔心。
由不知名病毒引發的「非典型肺炎」現正肆虐廣東省，令當地市民人心惶惶，在一片肺炎恐慌之下，早前憑劇集《戇夫成龍》「阿旺」一角而人氣急升的郭晉安，為了賺取六位數字的酬金，即使後日是有中國情人節之稱的元宵佳節，卻仍然赴穗登台，稱得上是搵命博。
百萬保險加多77萬
安仔後日登台的廣州時代花園，不少無綫藝員如羅嘉良、葉璇、宣萱及佘詩曼等，均曾在該處演出，而江華上周六亦剛在時代廣場登台。今次安仔在病毒傳染高峯期仍照原定計劃直闖廣州，主辦單位為安全起見，特意將平日為登台藝人所購保險之一百萬港元最高賠償額，加碼至一百七十七萬港元。
安仔昨日接受本報電話訪問，得悉主辦商為他加碼買保險時，他說：「應該要嘅，健康好緊要㗎，我知嗰邊啲病菌好犀利，但我冇諗過唔去，應承咗就唔可以甩底，我諗都唔使過份擔心，我又唔戴得口罩，唱歌時冇理由戴住口罩啫。」
千叮萬囑帶備藥盒
問到安仔會否效法廣州市民搶購白醋作消毒之用？他說：「唔會啦，成幾十蚊支，俾人炒到咁貴，我屋企有用開殺菌嘅香薰，啲蚊聞完，飛飛吓都會跌落嚟。呢兩晚我可以喺屋企點着啲香薰先瞓，再唔係咪上廣州嗰陣時，帶埋上車點囉，其實一個人平日嘅健康係最重要，健康啲就殺菌能力都好啲，我嘅抗菌能力幾好㗎，可以天然殺菌。」
雖然安仔並不擔心感染肺炎，但其女友歐倩怡卻坦承為愛郎感到十分擔心，她昨日在電話中說：「我擔心㗎，都會驚，我屋企人係醫務人員，平日我出埠做嘢，佢哋都會幫我預備藥盒，入面有止痛藥、感冒藥、消毒藥水、消炎藥同膠布之類，我會千叮萬囑佢帶定個藥盒，同埋要記得將個咪消毒，啲咪好大陣口水
祖兒連捱四晚通宵
此外，安仔與容祖兒昨晨在蘭桂坊拍攝新劇《美麗在望》時，安仔透露今年情人節要在工作中度過，他說：「我同Cindy（歐倩怡）拍拖三年，一直都冇慶祝嘅，撞啱嘅話咪一齊食飯囉！我冇錢呀，買水晶扮鑽石送畀佢啦。」
對於近日有網站選安仔為夢中情人第一位，安仔說：「乜咁錯愛呀？大家令我好驚喜，我諗啲人揀我嘅原因係覺得戲中嘅阿旺對老婆好好，好專一，女仔心目中都好想擁有專一嘅男朋友。現實中嘅我就梗係百分百完美夢中情人啦，我標榜住專一嘅形象，如果唔係，戲入面又點會做得咁好？」而祖兒表示為拍劇已連踩四晚通宵，故昨日她因太過疲倦而感到頭暈。
採訪：比華利、朱芷瑩
攝影：卓美娟
