孫九招救市，現在睇起嚟，軟弱無力，對樓市全無幫助，從一手樓滯銷，金管局宣佈負資產宗數增加，就知一二。失業率高企，減薪裁員之風不絕，大家都唔敢放心買樓，任孫公出乜招數都冇符。
孫九招其中一招就係停建居屋，好多做樓盤建築嘅公司立即冇晒生意。新年時份，見到惡佬明賦閒在家，頗有感觸，一個咁有經驗嘅專業工程人員，正值精壯之年，竟然冇工開，實在係社會嘅損失。據惡佬明講，佢有好多同行都係咁，冇符，最令佢羨慕嘅，就係當年入咗建築署嘅同學，𠵱家同樣冇工程做，但佢哋係公務員，唔會炒魷魚，日日照返工，照支薪水等退休，人哋冇工開，全無憂愁。私人公司啲工程師冇工開就要返屋企食自己，幾傷也。
現時只有一啲基建做吓，益吓土木工程佬，惡佬明係做樓盤建築嘅，自然分唔到一杯羹。據惡佬明講，現時工務局試行兩年新投標制，就係投標七分講價錢；三分講技術評分。價錢當然係愈低愈好，技術評分就比較主觀，好多時講主事人嘅判斷，不排除其中夾雜交情作用，所以惡佬明話：「𠵱家冇官照，唔掂㗎，一定要維持番良好關係，唔好輸蝕畀人。」
咦，咁講法，容乜易發生以前啲集體食老鼠斑、晚晚歡宴嘅事件？惡佬明話：「為免以後有人側側膊，技術評分方面唔應該採取委員會負責制，負責挑選contractor嘅委員應該每人簽名認頭佢自己畀幾多分，以便翻查紀錄，出錯時有人孭鑊。有呢啲紀錄，就唔怕有人晚晚食老鼠斑啦！」