城中注目嘅豪宅新盤薄扶林貝沙灣，經過前期大量資料介紹後，真面目今日曝光。發展商電訊盈科將呢個新開發區數碼港，包裝成極具歐陸風情地段。售樓書重甚有份量（圖二），一書三冊，由會所介紹到單位間隔，巨細無遺。
配合呢個世紀豪宅盤，樓書包裝亦別具氣派，將法國南部嘅優雅風情，帶入呢個沿海而建嘅物業。聽電盈顏金施講，發展商想將貝沙灣標榜成亞洲蒙地卡羅，所以樓書上多次用上古堡圖畫，其中粉紅色古堡，係法國南部St-Jean-Cap-Ferrat嘅古堡（VillaEphrussideRothschild），電盈覺得佢典雅得來不庸俗，好襯貝沙灣風格。
至於示範單位同售樓處，會有博物館般嘅擺設，布局亦會以宮廷式風格。聽聞，電盈基建主席李智康親赴歐洲揀選古董，剛趕及運到，睇樓市民要落足心機睇吓嘞。
利嘉閣前晚周年聚餐，除請發展商同銀行代表出席之外，重有表演助興，董事都瞓身演出，甚至連施老闆都唔例外，帶領一眾董事舞大旗，認真少見。呢個節目叫做「旗開得勝新里程」，預祝公司今年旗開得勝。
蘭西印象中只係見過施生喺中原周年聚餐同施太跳舞，今次都可以話係新突破，可見佢決心要搞好利嘉閣。
地產代理競爭愈嚟愈大，一有成交就會第一時間「通天」，爭住報畀傳媒，但講出嚟嗰位未必係做成嘅經紀，純粹叨光，所以有啲代理行見自己單成交俾人報咗，第日都會再出稿，講明係佢哋促成。
好似北角嘅嘉華國際中心（圖四），最近26樓全層租出，係由萊坊國際做嘅，佢哋話個租客係北美企業，想開拓香港市場。
𠵱家市場普遍睇淡寫字樓前景，大手租務真係少之又少，萊坊做到全層租務，雖然淨呎租六蚊唔夠，但有近兩萬方呎，都唔算細嘢㗎，所以佢哋出稿以明正身，攞番個彩。
首創喺銅鑼灣維園年宵擺檔（重點係宣傳樓盤）嘅恒基地產，正月都未完，集團營業部總經理張炳強就已經諗緊下個年宵點做。
佢建議賣福袋，除有一大堆過年物品，重有買樓優惠券，限定大年初一買樓使用，果然轉數快。恒基逢農曆新年都賣到樓，今次重將新春優惠延長到3月2號。
張炳強透露自己屬羊，今年犯太歲，但佢一啲都唔擔心，話好多嘢都睇自己點諗，樂觀啲咪冇嘢囉。
𠵱家啲樓就算未賣得發展商都要不斷搞宣傳，以免被人遺忘。好似由影星成龍同英皇集團合作嘅大埔龍成堡，最近就畀一班天文發燒友，喺現樓天台安放兩座天文望遠鏡，拍攝月球、土星同木星等天體，重試圖拍一顆叫做「2002V1」嘅新彗星。
代理美聯咁做，係想畀大家知龍成堡四周視野廣闊，特別適合觀星賞月。
蘭西
電郵地址：
