舊年曾經威到可以畀面色木村拓哉睇嘅花旦井川遙，唔識把握機會，結果俾人彈冇演技冇口才，人氣有如曇花一現。遙妹從「大女優」夢中驚醒，即刻飛去內地上海拍攝新寫真集《西紅柿》救亡，不過觀乎fans嘅反應，相信遙妹下次都要嚟次終極性感至得囉！
平心而論，遙妹今次喺寫真集入面以西紅柿（即係番茄）自喻，化個濃妝配上多套名貴旗袍同總值四百幾萬港紙嘅名牌VanCleef&Arpels首飾，喺上海各古舊建築同毛澤東肖像前搔首弄姿，夠晒詩意，佢又肯露背露腿，比起一味靠水着通山跑嘅寫真集，新鮮得嚟有美感！就連宣傳握手會，遙妹都喺珠寶店度搞，好明顯想走高格調性感路線。
但綜觀買咗本寫真嘅fans喺網上嘅留言，大多數係「拍得好靚，但講養眼比起之前本《Premium》差好遠！」「點解冇水着嘅？」又或者「唔知井川遙下次除咗脫，重可以有乜突破？」全部都係負面評語，今次遙妹可謂對牛彈琴囉，難怪前幾日佢會喺某個記者會上痛哭啦！