唔少車主都以為汽車用嘅二手零件，好多都係又殘又舊；但其實大家又知唔知道，現時嘅二手汽車零件係分成兩個主流，一係日常更換嘅零件，另外就係一啲特別版嘅貨色，而且價錢重要比新貨便宜一大截。今日我哋就特別為大家帶來一啲，質優價廉嘅二手汽車零件，其中一套超型18吋D-Power跑車合金胎軨，都只不過係賣$5,500，比新貨足足平咗接近一半，不如𠵱家就嚟睇吓有無邊件筍貨啱你啦！
記者、攝影：郭信強
據專營二手汽車零件嘅鄧先生表示，購買呢啲特別版二手零件好處係價錢平；一般嚟講，八、九成新嘅二手零件比新貨嘅價錢，要平出一半至三分之二，不過購買時要檢查清楚，最好到有信譽嘅二手零件店購買。以鄧先生經營嘅零件店為例，除入貨時會留意貨物質素外，重會給予客人一段時間嘅保用，從而令客人買得更加放心呢！
響各類汽車零件中，以汽車胎軨最昂貴，因為一旦要更換胎軨就要一次過換晒四條，絕對係將一件零件嘅價錢乘四倍；所以今次為大家介紹嘅精選二手胎軨，絕對唔係一般貨色，全部係名牌之餘，而且價錢重低過半價㖭！
產品提供：黃山汽車用品（25714781）
原價：$2,300（每條）
現價：$5,500（全套及平均每條$1,375）（不連裝工）
折舊程度：9成新
適用車種：凌志IS200、豐田Previa等車款
評語：D-Power響日本係列在名牌之榜，評價就同5次元一樣好，不過喺香港市場較為少見；而呢套D-Power18吋胎軨，用上與凌志IS200配用嘅一套原裝胎軨相近嘅五幅式設計，不過就用上雙色配搭，而且更用上高壓鍛造，耐用程度來得更高呢！
原價：$4,300（每條）
現價：$6,500（全套及平均每條$1,625）（不連裝工）
折舊程度：9成新
適用車種：日產SkylineGT-R等車款
評語：5次元係高性能車款用胎軨嘅大哥大，而呢套頭窄尾闊嘅日產專用胎軨更見罕有，除咗前8.5吋和後9.5吋闊外，兼且重用上夾層設計，不單止有更堅固嘅結構，同時亦易於維修。
原價：$2,300（每條）
現價：$6,000（全套及平均每條$1,500）（不連裝工）
折舊程度：9成半新
適用車種：各款用上大五孔胎軨嘅車種
評語：非常新淨嘅VersusMillenio18吋胎軨，款式係以BBS嘅GT為主，但色調較為特別，適合車身顏色較淺色嘅車種。
原價：$2,300（每條）
現價：$3,000（全套及平均每條$750）（不連裝工）
折舊程度：8成半新
適用車種：各款用上大五孔胎軨嘅車種
評語：VersusDolge係一套非常有型嘅五孔式胎軨，有點保時捷跑車用胎軨嘅影子，而重量亦頗輕，加上黃色嘅字款，望落好有跑車Feel㗎！
原價：$2,800（每條）
現價：$3,000（全套及平均每條$750）（不連裝工）
折舊程度：9成新
適用車種：各款富士車系
評語：以品牌嚟講，呢套LineaSport嘅BE5係富士車主之選，由於富士車系啱用嘅胎軨選擇唔多，加上價錢非常昂貴，所以呢套BE5會係熱門嘅18吋胎軨首選。
除多款二手胎軨外，今日我哋重為各豐田及凌志車主，介紹一啲既罕有又便宜嘅二手改裝零件，從而幫你慳唔少㗎！
產品提供：威記汽車零件（27149884）
AdvoxRS氮氣避震頂級之選
原價：約$15,000至$18,000（一套）
現價：$5,000（全套及有盒）（不連裝工）
折舊程度：9成新
適用車種：凌志IS200
評語：Advox氮氣避震係豐田跑車配件最頂級嘅選擇，吸震效果近似歐洲車款，所以非常受歡迎；而呢套避震嘅塔頂和彈弓上嘅紅色油重係原裝，同埋已經過檢查，並無出現漏油同老化嘅情況。
TRD藍色避震 Camry啱用
原價：約$6,000（一套）
現價：$2,500（全套及不連裝工）
折舊程度：9成新；適用車種：98年後嘅豐田Camry
評語：對於Camry嘅車主嚟講，專用高性能避震可謂可遇不可求，因為改裝時要顧及行車舒適性，所以TRD就特別設計出呢款避震給Camry；呢套專用避震唔單止價錢平，而且市面上連新貨都難搵到，夠晒罕有。
SheepdogCorolla專用尾鼓 價廉新淨
原價：約$1,800
現價：$1,000（不連裝工）
折舊程度：9成半新
適用車種：新款豐田Corolla（NZE121）
評語：Sheepdog嘅最新款Corolla專用尾鼓，唔會影響VVT-i嘅扭力輸出；而呢個Sheepdog尾鼓非常新淨，並無生銹，但價錢就同新貨相差約$800。