不少人在順境時自在從容，一旦遇到逆境便茫然不知所措。跟佳滿海鮮菜館的老闆彭氏兄弟談過後，不期然想起《誰搬走我的乳酪？》書中的兩隻聰明的小老鼠，遇到變化時立刻應變。他們一家四口由手袋廠轉戰飲食界，捱過半年低潮，終於變為不少街坊心目中的平價飯堂。
記者：邵超
攝影：陳盛臣
彭家除阿明做廚師外，一向在深圳市龍崗經營手袋廠，九九年眼見生意大不如前，一家人商量後決定謀定後路。思前想後，橫豎大家都愛吃，阿明做慣飲食業，以賭一鋪心態在馬鞍山搞茶餐廳，阿和兼顧打理手袋廠，慢慢拓展出大埔分店。
佳滿海鮮菜館大埔分店由彭氏兄弟打理，走入店裏，滿目皆是街坊，每枱總會看到十八元、二十八元或三十八元特價小菜的蹤影，碟頭都唔小，不少街坊索性當這裏是飯堂。阿和回想當初因為舖址稍僻，很多街坊根本唔知有這間舖。
「當時預咗蝕錢，始終係小本經營，好多事要親力親為。裝修除咗電工外，髹漆、洗爐頭等都是自己搞掂。我哋試過在小巴掛傳單，上樓逐間派傳單，做埋外賣和夜場，真係乜都做。」
菜館開業不久，彭家再次開會，為的是關店的時間。
「當時附近得一、兩間舖頭做夜場，我哋收凌晨兩點，夜晚十點至十一點之後根本無客，我同阿爸阿媽想收早啲，阿哥堅持兩點收舖，我哋咪一條心支持他的決定。」
其實這個決定絕對是冒險，阿和話菜館試過經濟有困難，自己攞份糧出來周轉，幸好供應商有時會延長數期，大家一齊捱。
「捱咗半年，後來反而愈夜愈旺。」如果當初彭家選擇少數服從多數，也沒有後來的大埔分店，果然是「兄弟同心，其利斷金」。
由手袋廠轉做食肆，一家四口分開兩店幫手，最近的一次團年飯已是數年前，無論在舖或在家，永遠唔會齊人。阿和指自己為食，最常做的事是試菜，在外面試到新菜會記下，然後返舖研究，而哥哥為了菜館更是絞盡腦汁度新菜牌。
阿明：「兩間舖穩定後，我出去跑過一年，再返舖頭幫手，唔想原地踏步。親身去做好過去食，我係中華廚藝學院第一屆畢業生，𠵱家讀緊兩個課程。世界變緊，有證書比人有着數。」
現今市道不景，彭家一家人不斷增值，其靈活變通的思想，真係值得我哋學習。
熟客心聲
砵酒瀨尿蝦$68
瀨尿蝦本身很大隻鮮甜，浸過酒更加發揮出清甜的味道，以$68呢個價錢食到咁多隻蝦，真係好抵食。
外間的梅子醬炒腩排較酸，阿明親製的梅子醬用新鮮梅子加埋桂花，甜得嚟重好香。
魚湯浸花蛤$48
魚湯是佳滿最新主打，以上湯打底再加鯪魚煲的魚湯非常鮮甜，阿明細心地加埋胡椒粒辟魚腥，魚湯可配數款菜式，每日賣完二十客柯打便截單。
店名：佳滿海鮮菜館
地址：大埔南運路富雅花園1號舖
電話：26500033
營業時間：6:30am-1:00am