請大家深呼吸！以下係「最理想情人」網上選舉結果──葉劉淑儀。冇錯，係保安局局長葉劉淑儀，喺女政治人物中當選為最理想情人，得到四百零九票，高過排第二嘅余若薇四十五票，排第三係劉慧卿，跟住係廖秀冬，連董太趙洪娉都有一百四十四票喎。應該點理解呢個選舉呢？
原來投票嘅千五人中，有六成係十三至十九歲少年，梗係鍾意玩啦！而選舉分開六類，各有男女組別，一定要投晒十二組至得。城市大學社會科學學部高級講師馮偉華認為，可能係年輕人鍾意啲人敢講敢做，不過呢啲咁嘅選舉，好多時係講短期記憶，即係嗰排邊個紅就投邊個。
值得一提係陳方安生，候選表格上冇佢個名，都有三十四人喺「其他」嗰欄特別輸入佢個名，顯示唔少人仍然懷念佢──唔係八方自說自話，係主辦選舉嘅MSN講嘅。
男政治人物中嘅理想情人就由政務司司長曾蔭權當選，煲呔嘅票數拋離第二嘅梁錦松一倍，另外，有二百一十五人揀董建華，而「長毛」梁國雄竟然同謝霆鋒有得揮，一樣得到一百四十六票！
至於李嘉誠得九百零三票，只係比成個選舉票數最高嘅方力申少四票，馮偉華話：「如果選偶像就話啫，但係選情人……」似乎香港嘅「嫁個有錢人」心態都幾犀利！
傳聞係余文樂同陳冠希爭𠝹對象嘅Twins成員鍾欣桐（阿嬌），就打低楊千嬅、陳慧琳、梁詠琪等，成為女歌手組別中嘅夢中情人，但阿嬌話自己喺現實生活中並非完美情人：「我大部份時間都要工作，有時間都要休息，同我做情人，真係夢中先可以見面。」
傳真︰2623-9278
電郵︰
