周一晚睇住美股先跌後升，趙飛雲心中暗喜，諗住今次可以按計劃趁反彈買Put輪，點知港股噚日早段升至9285已腳軟，午市更被23號仔東亞業績較預期差拖累，結果恒指要倒跌37點，收9194。
本來「23」係靚冧巴，沖涼揼骨嘜23號通常係靚女，不過自從23條立法爭拗搞到天翻地覆後，人人聞「23」色變，唔好話完全對東亞冇影響，東亞公布業績後急跌4.7%，除咗業績較市場預期差外，唔排除係有人對「23」有厭惡症。
東亞噚日以大陰燭急跌，技術急速轉弱，雖然最後守住50日線（現處13.80元）之上收市，報14元。但MACD線將插穿訊號線，形勢相當唔樂觀，東亞若跌穿50日線，沽貨離場照計唔會錯。
美股期指噚日偏好，有傳言格老將發表利好經濟言論，美股噚晚有機會連續第2日反彈，但港股近期走勢唔跟貼美股，作為指路明燈作用大減。趙飛雲仍維持港股反彈近9400買恒指Put輪嘅策略，恒指Put輪中，𠵱家以9556較可取，保守啲可揀9587。
意科（943）噚日窄幅上落，平收0.241元，形態上以旗形整固，仍按原定計劃以0.23元作止賺位，繼續持貨上望。
港股噚日雖然下跌，但新地（016）則持續造好，升破10日線阻力44.30元，以全日高位44.80元收市。新地若確認升破20日線45.20元，則初現轉機。另一方面，若新地受制於20日線，Put輪9529有可博之道。
趙飛雲