由兩大地產商新地同長實，攜手發展嘅天水圍新盤慧景軒，已展開前期造勢工夫。長實率先介紹該屋苑四周環境之餘，並講解吓配套設備。較特別係個戶外泳池，有別於一般新盤用湖泊式又或園林式設計，創新地用上高科技嘅光纖，名為「光纖變色泳池」。
光纖聖誕樹就見得多，光纖泳池都喺第一次聽。負責人話，原理係喺泳池底安裝光纖，夜晚就會發出又紅又黃嘅光線，增添戶外色彩。泳池有成二十五呎長，唔知到時住客會有乜感覺，想象吓，喺光纖輝映下，驟眼睇泳客都幾似金魚㗎。
發展商就話，成個會所有八萬方呎，管理費每方呎1.1元。地面設有蓋泊車間，提供234個車位。
華懋售樓部統帥吳崇武（圖二左三）每次出現，其左右手吳清蓮（圖二左四）多數都會陪伴，昨日記者會亦唔例外。蘭西同呢位清秀佳人有幾面之緣，佢周不時都會向記者補充樓盤資料，有時重會解答售樓安排及部署，同在場嘅經紀朋友亦言談甚歡。
由於兩位同樣姓吳，市場曾經揣測過佢哋有否親戚關係。蘭西昨日終於向經紀朋友打探到，吳清蓮應該係吳崇武嘅姪女，聽講佢重有華懋吳倩蓮之稱。
交通方便嘅住宅幾時都有優勢，好似太古將軍澳維景灣畔，美聯董事李志成（圖三）同蘭西講，近日就做咗一單外籍客生意。
話說位買家係巴拿馬商人，喺當地開藥房，同香港籍嘅太太回港度假，有日同親戚講開買樓，個親戚就強調交通好重要，推介維景灣畔，結果第一次睇樓就買下十一座35樓B單位，面積894呎，成交價321萬，扣埋啲優惠288萬，呎價3221蚊。聽講佢對屋苑環境同會所都好滿意，重以五成樓價做首期，認真豪爽。
另外，李志成又透露，日前一名外國回流客，又係第一次睇樓就買咗維景十三座高層單位，895呎，成交價343.5萬。據聞佢買樓當日啲文件唔齊，美記同事見機不可失，即刻載佢返屋企攞，免夜長夢多。
尖沙嘴港景峯買家開始陸續收樓，中原一姐劉瑛琳同蘭西講，唔少業主買嚟投資，𠵱家已經收到117個放租盤，細單位呎租16到18蚊，逾千呎嘅大單位就要23蚊呎。
劉瑛琳話租務成交中，有五名租客嚟自跑馬地，承租七百幾呎細單位，月租大約萬五六銀，之前租開跑馬地八百零呎單幢樓，月租要兩萬，𠵱家轉租港景峯，租金負擔輕咗。
農曆新年檔期上映嘅港產片《百年好合》票房理想，電影遠赴峨嵋山拍攝好多人都知，蘭西噚日聽信和租務部總經理陳昌傑講，呢套票房勁收嘅電影，其中一幕男主角古天樂結婚嘅場面，係喺黃金海岸酒店宴會廳拍攝。
蘭西睇過套戲，畫面確實幾有歐洲feel，拍出嚟好似外國一樣。
據知，除《百年好合》之外，唔少電視劇都曾經喺黃金海岸酒店同遊艇會取景。
蘭西
電郵地址：
