《行運超人》的成績總算托賴，可以放心放假去也。又係返鄉下，即係溫哥華，人人聽見都話：「嘩！乜咁悶？」就係貪佢悶，想忙想多姿多采不如留番喺香港，溫哥華勝在食嘢穩陣、滑雪正斗、物價相宜兼且有老友，日頭個個返工嘅時候，自己可以匿埋睇吓書，又可以返母校行吓，物識有冇靚人可以做生力軍。
每次放假前必定騰出幾個鐘頭行書局，因為如果帶錯書或帶唔夠書的話會直接影響成個假期的充實指數。
大致上會選購工具書幾本，充實自己某方面的不足，發現有幾本教人如何思考的新書，非常適合早上起床後，神清氣朗地閱讀，睇完希望可以聰明啲。
愛情小說總少不了，每位作者的買兩本，看看不同作者的不同愛情觀，有的較勇敢、有的較保守，晚上入睡前閱讀，透過文字好好談幾場戀愛，希望可以在夢中捕捉到一點愛情感覺，讓我也寫一個愛情故事。
今年的特色是書局內推介很多關於到國內謀生的書籍，不同行業的人寫出自己多年來在國內營生的經驗，幾十元、幾個鐘頭便可分享到一些寶貴經驗，抵到唔恨。
放假不一定要遊山玩水、瘋狂購物，我求的是換一個環境，換一換經常見到的面孔，手提電話與傳呼機關掉，靜下來，一杯靚咖啡，一本書，世界原來係咁嘆㗎！