早前本報報道過內地豪客在港掃金飾，八方噚日同以砌出金廁所而出名嘅恒豐金業主席林世榮食飯，講起新年期間一名來自浙江嘅大豪客，佢喺紅磡展場內一擲四十萬買金銀珠寶，重係現兜兜即時畀茄殊（現金）㖭！不過林生話以往績作比較，呢位浙江同志仍與來自上海嘅紀錄保持者有一段距離，嗰位上海同志一鋪總共買咗六十萬金飾，真係買部靚車都得！
講開又講，林生話當年搞金廁所嘅時候，曾經諗過請一個皮膚靚靚嘅女星拍廣告。林生嘅構想係叫女星着件高衩旗袍，叫佢坐落個金馬桶（着旗袍坐，唔好亂諗野），再影住佢從高衩中露出嘅雪白大髀！不過，最後因為有女性高層反對，至令大家不能欣賞到呢個「半邊銀月亮，對着一個金太陽」嘅廣告片！以上文字比較三級，請見諒。
傳真︰2623-9278
電郵︰