早排我大口羅拉睇日本雜誌，見到電視台人員爆料，話木村拓哉好錫同佢一齊拍新劇《GoodLuck！！》嘅柴崎幸，兩個人有冇「景轟」我就唔知，不過木村同柴崎幸真係好老友，睇佢哋喺錄影廠度玩到癲晒就知啦！
話說有雜誌記者早排混入TBS電視台嘅錄影廠，咁啱正喺度趕拍《GoodLuck！！》嘅木村，喺晚飯休息時間，同拍檔堤真一攞咗好多日本鬼怪面具出嚟，跟住一人戴一個扮鬼扮馬喺走廊搞搞震，而柴崎幸亦早有準備，攞住成包豆向兩隻嘩鬼狂撒，十足十日本人慶祝撒豆節一樣。
木村同堤真一當然唔怕柴崎幸啦，佢哋重癲到夾手夾腳抱起呢位靚女㖭！雖然三位演員咁貪玩，但佢哋最後亦乖乖咁執番晒地下啲豆，相當好手尾。
講番木村套《GoodLuck！！》，收視真係唔錯，破天荒喺關西地區連續四星期衝破咗三十點收視，相反由松隆子孭飛嘅富士重頭劇《經常與你一起》，收視每下愈況，過唔到二十點，難怪啲人覺得松隆子冇咗木村好唔掂啦！