廉政專員李少光最近喬遷，搬咗入盛傳係政界風水屋嘅大圍名廈瑞峰花園，同環境運輸及工務局常任秘書長劉吳惠蘭、立法會議員張宇人等做鄰居。八方噚日喺廉署新春茶敍見到李少光，於是問吓佢搬入瑞峰花園，係咪想再上一層樓？李Sir笑笑口話，搬屋同風水無關，係愛妻嘅主意喎。照八方話，李太咁做，都係為咗老公啫。
講開廉署，啲蠱惑仔愈嚟愈精，廉署老友同八方講，調查人員最棘手嘅問題，就係點樣辨別疑犯或者證人有冇講大話。原來其中一個辦法係留意對方嘅小動作，例如有冇不停吞口水，或者眼神游移不定。另一個棘手嘅問題，則係點樣說服污點證人出庭作證，由於大部份污點證人唔係「蠱惑仔」就係「身有屎」，所以調查人員要利用非一般溝通方式，即係動之以誠，等佢哋明白維護公義好重要。
傳真︰2623-9278
電郵︰