方中信同莫可欣早排拍拖去帛琉潛水避年，佢兩個同埋四個朋友一行六人，除咗去潛水勝地帛琉之外，重去埋南太平洋一個名為Yap嘅小島。可欣大力推介Yap呢個地方，佢話嗰度除咗可以潛水之外，又可以睇大魔鬼魚，同埋攬住海豚游水，自己釣完魚又可以食，嗰種與世隔絕嘅感覺，城市人應該要感受吓。
不過，Yap當地嘅女土著係唔着上衣周圍行，佢哋反而將大髀視為最重要嘅部位，唔可以隨便畀人睇，可欣話：「我哋游水着泳衣嘅地方係當地人唔會去嘅，但出入其他地方嘅時候，都尊重當地習慣，着番條長啲嘅褲。」方中信重特登走去同個左中半裸女土著影相，但因為個女土著樣貌生得比較中性，佢話將張合照畀朋友睇時，大家都唔知佢係男定係女。
可欣話今次行程大家都增磅而回，因為佢哋每朝潛完水就食飯，嗰度冇電視，夜晚好早瞓覺，佢話：「我已經衝破一百三十磅大關，方中信都過咗一百六十磅，一返到香港就要開始減肥。」
焦媛噚日同李潤祺喺藝術中心為《赤之禁室》作最後一場預演綵排。焦媛噚日扮模特兒，而李潤祺就飾演議員，但係場戲個意識就幾大膽，講及性虐同吸毒，而李潤祺重捐入焦媛裙底。問焦媛會唔會戲假情真？佢話：「吓？唔知呢？不過演嗰時一定要投入，不過預演嗰啲都未算係最激，尾段我可能會全裸。」
周杰倫、徐若瑄同蔡依林嘅感情，踏入新嘅一年仍然糾纏不清，有報道指前幾日，即初六嗰晚，周杰倫同啱啱由日本返台灣嘅徐若瑄去打籃球，其間周杰倫重不斷投球畀徐若瑄射波，二人嘅歡笑聲震撼全場。
相反，蔡依林就形單影隻喺排舞室練舞。事後周杰倫同徐若瑄承認一齊去打波，徐若瑄話：「我們的友誼很健康，不會因為傳言而不跟他做朋友。」
洲立電影公司噚日喺尖沙嘴美麗華酒店舉行新春團拜，筵開八席，洲立高層黎筱娉都有出席。黎筱娉講開今年洲立嘅大計，佢話嚟緊嘅重頭大片、里安納度主演嘅《紐約風雲》預計喺奧斯卡有唔少提名，所以香港會安排喺下個月十三號，奧斯卡舉行前上映，黎筱娉重話：「洲立嚟緊會向多元化發展，而前年嘅生意額有十億，上年就有九億，都係有升有跌！」
名模Rosemary、陳敏之等噚日喺紅磡出席活動。記者問陳敏之情人節會點過？佢話佢爸爸上個月尾驗出患末期肺癌，所以心情大受影響。陳敏之今年唔會同男友大事慶祝情人節，佢話：「我爸爸今年五十幾歲，平時行得食得，點知一發現就係末期咁嚴重。我一知爸爸患癌，心情大受影響，做做吓嘢都忍唔住喊，𠵱家我一有時間就會去陪佢。」
