小初噚日聽經紀黃講，話呢排好多芬佬求貨，對象多數係一啲比較有實力嘅工業股，而且要貨嘅數量亦唔細，因此呢類優質工業股一旦受到基金垂青，股價可以升到唔停，買中相當和味。
經紀黃又話，聽聞有部份芬佬要貨之餘，亦收取非常高昂嘅安排費用，但一樣有公司肯畀，皆因諗住一登龍門，股價會聲價十倍。
此外，亦有大戶向芬佬推銷手上嘅貨源時，肯以較大折讓價出售。其中一隻收到風，有大戶想配售就係聯洲國際（048）。
小初聽完覺得有啲奇怪，皆因聯洲向來都係私家派對格局，街貨唔算特別多，而且幾乎通街都知邊個人揸重貨，究竟其中有咩人想沽貨走人呢？真係耐人尋味。
聯洲早排併過股，噚日微升一個價位，現價做緊1.29元，仍在低位徘徊，噚日成交金額就唔夠300萬元。
隻股雖然日日都見有美資大行買盤掛入，但總係唔見股價大升，確係奇怪。
慕容小初