東亞（023）晏晝派成績表，本身股價散落去，收14元，唔見70仙，影響埋恒生（011）亦跌1.50元。但大市氣氛仍然良好，恒指只係微跌37點。
地產股榮辱不一，新地（016）收44.80元，升40仙，全部升幅都係喺下晝錄得，似乎率先見底，短炒新地Call輪，揀9566同9539。9566今年4月夠鐘，現價25.5仙，溢價6.1%，槓桿率17.6倍；9539今年5月夠鐘，現價12仙，溢價11.6%，槓桿率37.3倍。兩隻輪溢價唔算低，炒作宜短不宜長。
聯通（762）高低波幅3個價位，收5.30元，冇升跌。5元邊邊搵到支持，留意回落時搵啲Call輪玩吓，對象係9383，隻輪今年9月到期，大把時間，現價4.1仙，溢價18.6%，槓桿率12.9倍。因為屬細價仙輪，每日波幅15%閒過立秋，炒作採低買高賣策略。
華創（291）上上落落，收7.15元，跌5仙，近期喺7元至7.30元之間反覆，每次挨近7元，就係博反彈之時，吼隻Call輪9270，升到7.30元之時，則沽輪賺錢落袋。有跟開華創輪嘅朋友，必然知道華創輪實際得隻9270，9月到期，現價10.8仙，溢價5.5%，槓桿率6.6倍。限價10仙上車，12仙落車。
章盛