靚女賓架D自新加坡寄來賀年卡，除恭喜恭喜之外，並附上一篇《讓身體停在巔峰期》嘅文章，作者吳韻儀，原載二○○二年六月Cheers雜誌。左丁山孤陋寡聞，唔知呢本雜誌係邊度嘅產品，睇內文就估係台灣出版嘞。賓架D以新加坡為基地，周圍飛，見聞多過左丁山好多！
賓架D係靚女一名，當然關心健康，如何維持好身材。呢篇文章有幾個要點：第一，人到了二十五歲以後，就開始老化，三十歲以後，老化速度更快。第二，二十五歲前嘅每日食物份量，喺二十五歲之後就唔可以維持一樣，一定要減，因為二十五歲以後身體消耗嘅食物熱量比以前急跌六成，三十歲左右，如飲食習慣不變，就會積累小腹、胖臂、啤酒肚；第三，如要維持身材，飲食量（二十五歲以後）就要逐年減少，再加上一個星期三日做運動，每次要持續半粒鐘以上。運動唔可以激烈、過於競賽性，因為咁樣就係預支體力，好多奧運選手英年早逝！專家話過多過份嘅有氧運動可能為身體帶進過多氧氣，產生「自由基」，反而令身體老化得更快！
其他重講到皮膚老化，如何護膚，不過呢啲左丁山興趣唔大。最有興趣就係要知道如何保持身材，唔好過肥。睇怕中年人唔做運動唔得，因為自己二十五歲前每餐食四碗飯，𠵱家只食一碗飯，仍然體重增加，皆因缺乏運動之故。各位老友，過咗二十五歲就唔好逞英雄嘞。