港股噚日先升後跌，主要受到東亞（023）公布業績表現奇差所致。市場最差都係估東亞盈利倒退2%左右，點知開出嚟跌近20%，跌幅比預期多咗成10倍，真係令人大失所望，市場隨即諗恒生（011）及滙豐（005）業績表現會否一樣咁差，恒指一度跌過81點，低見9151後才回穩，其實全靠美林頂住中移動（941），恒指最後收9194，跌37點，成交64.66億元。
星虹控股（397）早前話老詹入股19.8%，其後佢增持至約20.17%。較早前有消息話老詹有意做星虹大股東，以現時佢嘅持股量約20.17%計，即使要避開30%全面收購觸發點，仍有接近10%的增持空間，即係話星虹股價重有好大上升空間。不過，該股近日開始調整，噚日又跌11.8%，收報1.5仙，似有人壓價收集。
粵海系復牌，粵投（270）只話母公司有意洽購粵啤（124）及粵海制革（1058），但洽談無進展。雖然如此，粵投復牌仍然勁升9%，收1.21元，成交增至7497萬元，粵啤更急升17.8%，收0.86元，成交達3992萬元；粵海制革則升10.6%，收0.23元，但成交不多，僅15萬元。今次公布洽談無料到，反而為未上車的股民提供上車機會。黑客話，噚日散戶仍無追貨意欲，入市買貨主要係幕後炒家，刻意將股價推高，吸引散戶注意。粵海系肯定會進行資產重組，問題只係幾時而已，一日未公布訂立協議，班炒家都未必食胡。
廣州最近傳出奪命肺炎，搞到白醋被搶購一空。ｅ莉莎隨即諗起隻中國糧油（506）應該有白醋賣，問阿虎有冇得諗。咁都得？
阿虎