經過禮拜日上盤大災難後，睇怕上盤客喺呢輪國際賽都會睇定先出手。我求大俠奉勸大家落槌前一定要考慮清楚各隊臨場軍容、戰意同埋有無後顧之憂。除非覺得實力真係太懸殊，否則上盤客要提防。
唔使講咩，淨係講中國對巴西場波牌面差天共地，但波盤一直維持讓球半，水位重偏向高水，就知上盤客唔敢動手。查實國際賽（尤其係周中進行）多旺下盤，而我求大俠喺度再提醒大家嚟緊禮拜六、日歐洲有唔少球會大戰，好似米字國足總盃曼聯火併阿仙奴、德甲慕尼黑打吡戰，同埋意甲AC米蘭對拉素等等，涉及嘅國腳認真唔少喎。
嚟緊呢個禮拜六英超聯冇波打，但係唔代表一啲足總盃出局嘅球隊可以蛇王。尾三嘅西布朗就去咗西班牙集訓，備戰下個禮拜三作客富咸，以及跟住個禮拜日迎戰韋斯咸兩場護級大戰，領隊美臣起程前話西班牙嗰啲練習設施好啲，應該有幫助。我求大俠要讚美臣居安思危，另外波友下個禮拜不妨吼住可能脫胎換骨嘅西布朗啦。
上年入選西班牙國家隊參加世界盃、後來加盟拉科嘅前鋒盧基，今屆只係大後備，日前佢終於頂唔順，鬧教練艾路列達喺迎戰奧沙辛拿時戰略錯誤，重順便講埋從未同教練講過一句嘢。我求大俠好明白佢嘅心情，因為𠵱家連國家隊都唔要佢。不過佢都係唔好咁火爆，否則艾路列達索性以後睬你都儍，連後備都唔使你踢咪重慘？
意大利友賽葡萄牙前夕，唔少人重談論緊點解教頭查柏東尼唔選巴治奧入伍。老查日前話已經同意國足總傾好，準備搞場紀念賽表揚巴治奧、馬甸尼等前國腳。我求大俠覺得意足總同埋老查此舉好明顯擺定個盆畀巴治奧金盆洗手，唔使再俾「金童入唔入得番國家隊」呢個老問題困擾。
早排英國傳媒大肆報道英超球星豪賭，車路士嘅荷蘭國腳哈索賓基終於忍唔住，話：「錢係我搵，我鍾意點用關人鬼事？賭錢幫到我減壓。」我求大俠好佩服佢勇氣，亦覺得不無道理，之但係佢始終係公眾人物，玩時玩唔好太揚同埋唔好咁大數目囉。講時講，今晚荷蘭對阿根廷，佢唔會落注啩？