一手新樓可說是現時置業首選，青衣便有一個公屋客，半年來一直留意同區灝景灣貨尾，終於皇天不負有心人，在獲批政府貸款後，購得心水單位，重係最後一個分層戶，真係遲少少就錯失心頭好。
中原地產青衣分行經理麥成輝講，個單位係八座高層H室，面積945方呎，係發展商唯一嘅分層貨尾，重係示範單位。個客過去半年不斷查詢呢個單位有冇賣出，同埋售價嘅變化。
最近佢申請嘅自置貸款終於獲批，即刻用298萬買入呢個單位，呎價3153蚊，屬市價。發展商重送一年全屋保養。聽講買家今次入市，都係為咗等仔女可以使用會所同泳池。
𠵱家只剩番兩個相連單位待沽，其中一個係五座嘅G同F室，面積1463方呎，意向價約六百萬，另一個係六座嘅A同B單位，2263呎，索價一千萬。
香港貿易發展局下個月喺廣州舉行「香港房地產服務博覽」，今次係貿發局第四次喺內地搞同類活動，話晒貿發局都係官方機構，喺3月3號開幕嗰日同埋翌日嘅一連串專題講座，好多公司畀面做主講嘉賓。好似新地執行董事蘇慶和（圖二）嘅講題係「香港多元化房地產服務——提升成本效益及物業價值」，聽吓大集團點睇同點做，都幾有參考價值㗎。
港基物業日前攞到香港理工大學運動設施營運管理服務合約，為理大校內嘅運動設施，包括邵逸夫體育館、李格致運動場同廣安金禧體育中心，提供有關營運服務。今次又係理大第一次將校內設施用合約形式批畀私人機構營運同管理。
港基係長實嘅附屬公司，主要負責管理集團發展物業，甚少承接外面嘅管理工作，所以今次理大搵到港基做管理，都算大面子。
有謂遠親不如近鄰，蘭西近來收到唔少讀者電郵，希望可以推介吓佢哋屋苑嘅網頁，等多啲業主加入。唔同屋苑業主自發設立嘅網頁，都各有特色。蘭西覺得就算唔係嗰個屋苑嘅業主，都可以入去睇吓，因為有啲資料都好有用同有參考價值。
長沙灣昇悅居業主就e佢哋屋苑嘅網頁畀蘭西，裏面以網站連結一欄最特別，提供裝修、報章雜誌、消閒娛樂同屋苑業主會網站。屋苑業主會網站有啲其他新樓盤業主自設嘅網站結連，另外重可以入香港業主會個網，睇吓欠租人士名單，啱晒啲想買樓收租嘅投資者做參考。
昇悅居業主會網址係
利嘉閣今晚喺九龍灣國際展貿中心舉行周年聚餐，為顯示公司嘅實力，廣邀地產發展商同銀行界代表。
蘭西收到利記嘅傳真，附頁列出邀請發展商嘉賓嘅名單，總共有二十八間發展商代表，幾乎包羅晒全港嘅主要發展商，好似長實何雨盈同郭子威（趙國雄唔知出唔出席）、新地雷霆同蘇仲強等，其他就有太古、電盈、新世界、九龍倉、永泰亞洲、信和、嘉華地產、香港興業、華懋、嘉里等十幾間公司。聽講淨係發展商同銀行夾埋佔十圍以上，認真重手。
蘭西
電郵地址：
