積金局行政總監許仕仁嘅去留噚日終於有定案,出自許老爺自己個口,當然冇得錯。話說喺民政局嘅春節酒會上,許老爺忽然現身,有備而來答記者話下周一會有宣布,又話已經計劃好四月退休後會先去柏林,然後去巴黎,遲啲去日本,當然唔少得睇歌劇,言下之意,今次走梗。
八方於是追查點解佢老哥咁風騷,原來阿松剛拍咗板,准老許個副手陳唐芷青署理許老爺個位一年,直至搵到新人選為止,咁如果金管局副總裁陳德霖位夫人做得好,唔排除佢最後會坐正。
總之許老爺捱義氣做到三月底,之後就話之你。老許嘅太座幾個月前已經離開政府退咗休,兩個準備優哉游哉。
聽講佢兩公婆已搬離咗政府宿舍,老許一直心儀位於跑馬地有馬場景嘅禮頓山,𠵱家做埋馬會董事,住喺馬場對面最啱。
傳真︰2623-9278
電郵︰