佘詩曼因違例駕駛扣滿分而遭票控，昨日她第三度缺席聆訊，裁判官認為她至上周六才申請押後出庭不合理，因此發出拘捕令。名嘴鄭經翰指阿佘身為藝人，卻不懂自愛，他說：「咁遲先通知法庭，以為全世界都就晒佢，今次咪當係教訓咯！」
佘詩曼早前因違例駕駛，兩年內扣滿十五分而被票控。阿佘昨日本應到觀塘裁判法院應訊，但她第三度缺席聆訊，而她現時正與緋聞男友陳浩民在上海拍攝中央台劇集《愛本無約》。阿佘在上周六傳真文件通知法庭，要求押後出庭，但昨日裁判官表示考慮到整體情況，不明白阿佘為何不預先通知法庭，故此裁判官拒絕其延期申請，並正式發出拘捕令。
被寵壞！
對於阿佘因缺席聆訊而被法庭發出拘捕令，名嘴鄭經翰（鄭大班）昨日接受本報電話訪問時說：「作為公眾人物，藝人係特別惹人關注嘅，所以要特別小心自己嘅言行。佘詩曼搞成咁，只可以話佢唔自愛，無端端又俾人講，搞到要發出拘捕令好尷尬嘛，到時入境處通知警方，拉人時戴上手銬，幾肉酸呢？」
問鄭大班可覺得藝人普遍缺乏法律常識，他說：「我覺得大部份嘅藝人都太忙，而且俾歌迷、影迷、公司同傳媒縱壞咗，以為自己凌駕法律之上，乜都可以搞得掂，但係喺法律面前人人平等，出名嘅人犯法係冇着數嘅。卿本佳人，奈何作賊呢？」
當教訓！
鄭大班又說：「佢咁遲先通知法庭，以為全世界都就晒佢，今次咪當係教訓咯。」
阿佘拍檔方中信昨日在電話中直指阿佘大懵，他說：「可能近排佢要返內地拍劇，忙得滯遲咗遞交文件畀法庭，唔知道件事會去到咁嚴重啦！不過，如果係我嘅話，對於法庭嘅嘢一定好小心處理，就算喺內地幾忙都好，都應該抽一抽時間返香港上庭嘅。」
曾和阿佘合作拍攝劇集《十月初五的月光》的薛家燕則說：「我覺得阿佘呢次真係好慘，可能去咗內地拍劇，根本冇時間去處理啲法庭嘅文件，希望阿佘可以快啲冇事。」
齊拍劇！
至於曾和阿佘傳過緋聞的張智霖亦說：「吓，阿佘新年流流咁大件事？我遲啲又會再同佢合作，希望佢可以盡快平息呢件事。」
此外，陳浩民日前接受台灣記者訪問時，被問及會否和緋聞女友阿佘一起過農曆年，他說：「應該會吧，因為她跟我一樣都要拍劇。」
案件編號：KTD600/2002
採訪：張止寒、駱華齡、比華利
